Чемпион билан дуранг ўйнаган мураббий, суперсэйв амалга оширган посбон, иккита гол урган футболчи — Суперлигада 9-турнинг энг яхшилари
12 май 16:41
Янгиликлар

Чемпион билан дуранг ўйнаган мураббий, суперсэйв амалга оширган посбон, иккита гол урган футболчи — Суперлигада 9-турнинг энг яхшилари

Championat.asia сайти Ўзбекистон Суперлигаси 9-турининг энг яхшиларини аниқлади.

Championat.asia сайти талқинига кўра 9-турнинг энг яхши дарвозабони – Ботирали Эргашев ("Нефтчи")

Бу турда "Нефтчи" водий дербисида "Андижон" меҳмони бўлиб, 2:0 ҳисобида ғалаба қозонди. Фарғоналиклар посбони ўйин давомида бир нечта сэйвлари билан жамоасини қутқарди. Айниқса 21-дақиқада жаримадан йўллаган зарбадан кейин Эргашев суперсэйв амалга оширди. Шу орқали у Championat.asia ижодкорлари томонидан 9-турнинг энг яхши дарвозабони дея эътироф этилди.

Championat.asia сайти талқинига кўра 9-турнинг энг яхши мураббийи – Илёс Зейтуллаев ("Бунёдкор")

"Бунёдкор" бу тур Қаршида амалдаги мамлакат чемпиони "Насаф" клуби меҳмони бўлиб, 2:2 ҳисобида дуранг ўйнади. Зейтуллаев шогирдлари икки марта ҳисобда ортда қолиб якунда мағлубиятдан қутулиб қолишди. "Бунёдкор" Қаршидаги мағлубиятсиз сериясини давом эттирди. Шу тариқа ёш мураббий 9-турнинг энг яхши мураббийи деб топилди.

Championat.asia сайти талқинига кўра 9-турнинг энг яхши футболчиси – Асадбек Собиржонов (ОКМК)

ОКМК бу тур водийда "Қўқон-1912" меҳмони бўлиб, 3:1 ҳисобида иродали ғалабага эришди. Олмалиқликлар 72-дақиқага қадар 0:1 ҳисобида ютқазишаётганди, 64-дақиқада захирадан майдонга тушган Асадбек Собиржоновнинг иккита голи ОКМКга муҳим ғалабани келтирди. Шу тариқа Собиржонов 9-турнинг энг яхши футболчиси сифатида эътироф қилинди.

Championat.asia сайти талқинига кўра 9-турнинг энг чиройли голи муаллифи – Ойбек Бозоров ("Насаф")

"Насаф" бу тур ўз майдонида "Бунёдкор"ни қабул қилиб, 2:2 ҳисобида дуранг ўйнади. Мезбонлар сафида Ойбек Бозоровнинг голи чиройли чиқди. У жарима майдони ичида тўпни Мозговойдан қабул қилиб, бир ҳаракат билан икки рақиб қуршовидан чиқиб кетиб, тўпни дарвозанинг юқори бурчагига аниқ йўллади. Шундай қилиб, Бозоров Championat.asia сайти талқинида турнинг энг чиройли гол муаллифи деб топилди.