Мини-футбол бўйича "Тошкент вилояти ҳокими кубоги" турнирида паркентликлар ғолиб бўлишди

26 та жамоа қатнашган мазкур мусобақанинг ҳудудий босқичлари вилоятнинг Олмалиқ, Нурафшон, Чирчиқ ва Янгийўл шаҳарларида ташкил этилди. 

Ҳудудий босқичларда муваффақиятли қатнашган Паркент ТТБ, "Металлург" (Олмалиқ), "Аммофос-MAКСAM" (Олмалиқ) ҳамда Янгийўл жамоалари ярим финал йўлланмаларини қўлга киритишди. Финал йўлланмалари учун қуйидаги жуфтликлар ўзаро рўбарў келишди:

Паркент ТТБ - "Аммофос-MAКСAM" (Олмалиқ) – 9:4

"Металлург" (Олмалиқ) – "Янгийўл" – 5:2

Мусобақанинг финал учрашувлари Ўзбекистон давлат жисмоний тарбия ва спорт университетининг спорт манежида уюштирилди. Мусобақанинг очилиш маросимида Тошкент вилояти футбол ассоциацияси вице-президенти Асқар Жадигеров сўзга чиқиб, барча иштирокчиларга омад тилади. Дастлаб, учинчи ўрин учун кечган беллашувда "Янгийўл" жамоаси "Аммофос-MAКСAM" (Олмалиқ)ни 8:4 ҳисобида мағлубиятга учратди.

Ҳал қилувчи финалда эса Паркент ТТБ футзалчилари "Металлург" (Олмалиқ) жамоасини 10:3 ҳисобида доғда қолдириб, "Тошкент вилояти ҳокими Кубоги"ни қўлга киритишди.

Шундан сўнг, ғолиб ва совриндорларни тақдирлаш маросими ташкил этилди. Унда Тошкент вилояти ҳокимлигининг ёшлар сиёсати, ижтимоий, маънавий ва маърифий ишлар бўйича котибият мудири Азамат Камалов қатнашди. Тошкент вилояти ҳокимлиги томонидан таъсис этилган эсдалик совғалари ва Кубокни ўз эгаларига топширилди.

Қуйидагилар "Тошкент вилояти ҳокими Кубоги-2020" мусобақасининг энг яхшилари деб топилди:

"Энг яхши дарвозабон" – Лазиз Хўжааҳматов (Паркент ТТБ)

"Энг яхши ҳимоячи" – Эркин Худоёров ("Металлург")

"Энг яхши ҳужумчи" – Бекзод Тожибоев ("Аммофос-MAКСAM")

"Энг яхши ўйинчи" – Андрей Снетков (Янгийўл)

Ушбу тадбирдан олинган расмларни томоша қилинг: