Футболдаги энг дахшатли жароҳатлар (+18)

18.02.2006. "Ливерпуль" - "Манчестер Юнайтед" учрашувида Англия кубоги доирасида Йон Арне Риисенинг жарима зарбасидан сўнг Алан Смит жароҳат олганди. Футболчи 7 ой давомида жароҳатини даволади.

1996 йил "Ковентри Сити" ҳимоячиси Дэвид Баст "Қизил иблислар" вакили Дэнис Ирвин билан тўқнашиб кетган. Натижада Бастнинг оёғи синган ва суяк теридан ташқарига чиқиб қолган. 12 дақиқа давомида футболчилар майдонни қондан тозалашган, Петер Шмейхилга эса руҳшунос ёрдами керак бўлганди. Баст ушбу жароҳатдан сўнг 26та операцияни бошидан кечирди, бироқ профессионал футболга қайта олмади.

2007 йил июль ойида "Крус Асуль" клубининг 19 ёшли ҳужумчиси тўпни ўзига қабул қилиш жараёнида жароҳат олди. Бунинг оқибатида унинг оёғи 180 градусга айланиб қолди. Футболчи 3 ой давомида даволанди. Айни пайтда у "Веракрус" сафида ўйнамоқда.

"Канонирлар"нинг мухлислари "бразилиялик хорват"нинг "Арсенал" - "Бирмингем Сити" учрашувида олган жароҳатини яхши эсласа керак. Бирмингемликлар вакили Мартин Тэйлор билан тўқнашувдан сўнг 8 дақиқа давомида шифокорлар Эдуардога майдонда ёрдам беришган. Ҳужумчи бир йил давомида майдонга  туша олмаганди. 

1981 йилнинг 14 августида Эвальд Линен қўрқинчли жароҳат олганди. «Вердер» вакили Норберт Зигман унинг сонига бутсанинг таг қисми билан зарба бериб юборган, натижада Линеннинг сонида 25 сантиметрлик йиртиқ пайдо бўлганди. Футболчинин оёғига 23та чок тушган, аммо 17 кундан сўнг Линен машғулотларга қайтган. 3 ҳафтадан сўнг футболчи ҳеч нима бўлмагандек майдонга қайтганди.

2004 йил октябрь ойида "Блэкберн" - "Ливерпуль" учрашувида мезбонлар ҳимоячиси Жеймс Макивели Жибриль Сиссенинг оёғига кучли зарб билан тепганди. Франциялик футболчининг чап оёғи суяги очиқ синганди. Агар мерсиссайдликларнинг тажрибали шифокорлари бўлмаганида оёқни кесиб ташлаш керак бўлар эди. Сиссе уч ойдан сўнг яшил майдонга қайтганди.

УЕФА кубоги-98/99 доирасидаги "Лион" – "Селтик" учрашувида Ларссон рақиб вакили Серж Блан билан тўп учун курашиб жароҳат олганди. Швециялик футболчининг оёғи икки жойидан синганди. 8 ой даволанган Ларссон футболга қайтганди.

Бразилия чемпионати доирасидаги "Ботафаго" ва "Фламенго" ўртасидаги ўйинда Лучано Альмейда товонининг икки томонини синдириб олганди. Футболчи 5 ой давомида даволанганди.

Шу йил ЕЧЛ илк турида ПСВга қарши ўйинда МЮ ҳимоячиси Люк Шоу жиддий жароҳат олиб сафдан чиқди. 20 ёшли футболчи Эктор Морено билан тўп учун курашда оёғини синдириб олганди. Шоу дарҳол Эйндховендаги шифохонага олиб кетилганди, унинг ўнг оёғи иккита жойидан сингани аниқланди. 16 сентябрь куни Шоу операцияни бошдан кечирди. Шифокорлар ҳимоячи олти ой давомида даволаниши кераклигини айтишди.

"Астон Вилла" вакили Люк Нилис клубдаги учинчи ўйинини "Ипсвич"га қарши ўтказган. Люк рақиб посбони билан тўқнашувда оёғининг иккита жойидан жароҳат олганди. Шу тариқа унинг профессионал футболчилик фаолияти якунига етганди.

2001 йил 19 августида "Анжи" - ЦСКА учрашувида Россия футболидаги энг ёмон тўқнашув содир этилган. 75-дақиқада мезбонлар ҳужумчиси Будун Будунов ҳаводаги тўпга қараб сакраганди, ЦСКА посбони Перхун ҳам тўп сари интилганди. Футболчилар тўқнашиб кетишганди. Сергей ўйинни охиригача ўйнаганди. Аммо ўйиндан сўнг аэропорт кетаётганида комага тушиб қолганди. 29 августда Перхун вафот этганди. Шифокорлар унинг бош мияси шикастланганини аниқлашганди.

"Рединг" ва "Челси" ўртасидаги ўйин бошида мезбонлар вакили Стив Хант юқори тезликда "аристократлар" посбони билан тўқнашиб кетганди. Чех 8 дақиқа давомида майдонда қимирламай ётди. Ўша тўқнашувдан сўнг посбоннинг бош чаноғи синган ва мияси чайқалганди. Шифокорлар Чех 1 йил даволанишини тахмин қилишганди, бироқ 4 ойдан сўнг у майдонга қайтганди.

"Арсенал" ярим ҳимоячиси Арон Ремзи 2010 йил "Сток Сити" билан ўйинда жароҳат олганди. Уэльслик футболчи "Сток" ҳимоячиси Район Шоукросс билан 68-дақиқада тўқнашиб кетганди. Натижада Ремзининг иккита суяги синиб кетганди. Футболчи 8 ой давомида даволаниб майдонга қайтди. Таъкидлаш лозимки Шоукросс ўша вазиятда қизил карточка олиб кўзида ёш билан майдонни тарк этганди.

ЖЧ-2006 арафасида Франция Хитой билан ўртоқлик учрашуви ўтказганди. 10-дақиқада французлар ҳужумчиси рақиб сардори билан тўқнашув натижасида жуда оғир жароҳат олганди. Ушбу жароҳат туфайли Жибриль мундиалга ҳам бора олмаганди ва 6 ой даволанганди.

2006 йил 19 февралида "Рома" - "Эмполи" учрашувида римликлар сардори жиддий жароҳат олганди: тўпиғ ва тизза ости суякларнинг синиши. Франческо бир йил футбол ўйнай оламслиги тахмин қилинганди. Италиялик шифокорларнинг сайъ-ҳаракати натижасида "император" 4 ой деганда яна яшил майдонга қайтганди.

"Андерлехт" ва "Стандарт" ўртасидаги ўйиннинг 25-дақиқасида Аксель Витсел ва Марцин Василевски тўқнашиб кетишганди. Витсель тўпга ета олмаган ва рақиб устидан сакраб ўтишга уринди, бироқ кутилмаганда Василевскининг оёғини босиб олди. Натижада Польша терма жамоаси аъзосининг суяги очиқ синганди. Витсель эса 10та ўйинга дисквалификация қилинганди.

2006 йил октябрь ойида Дания чемпионатида "Виборг" сафида ўйнаган Якоб Ольсен жиддий жароҳат олганди. Даволаниш 6 ой давом этган. Ҳозир футболчи Дания иккинчи лигасида "Аллерёд" шарафини ҳимоя қилмоқда.