Туркия Суперлигаси. Аутсайдердан сенсация ва "Галатасарой"дан иродали ғалаба ёхуд 8-тур якуни

Галата саройида байрам

Айни пайтда, турнир жадвалининг "экватор" қисмида иштирокчилар жуда зич жойлашишган. Турни очиб берган ўйинда ҳам, ана шундай жамоалар "Галатасарой" ва "Сивасспор" ўзаро баҳс олиб боришди. Учрашувда, мезбонлар Флорин Андоненинг "дубль"и ва Раян Бабел томонидан урилган гол эвазига ғалабани қўлга киритишди. Бунга, сивасликлардан Аруна Коне ва Ешилюртлар киритган тўплари билан жавоб қайтаришди. Ушбу муваффақият орқали истанбулликлар жадвалда қувиб етишга эришишди.

Аутсайдер нараси

Ушбу турга қадар ҳали бирон марта ғалаба шарбатидан тотиб кўрмаган жамоа “Генчлербирлиги” кутилмаганда яна бу етмаганидек меҳмонда “Антальяспор”ни шармандали кўринишда ер тишлатди ва сўнгги ўриндан битта тепага силжишга муваффақ бўлди. Учрашувдаги голларга келсак, ўзига хос “бенифиси”ни намойиш этган Даниэл Кандеяш “хет-трик”ни расмийлаштирди. Жованни Сио “дубль” қайд этган бўлса, яна бир голга Станку муаллифлик қилди. Шундай қилиб, Анталия шаҳри жамоаси жорий мавсум ҳисобидан энг йирик мағлубиятини қуйи поғона вакилидан қабул қилиб олди ва 10-ўрингача тушиб кетди.

Рақобатчилар баҳсида измирликлар мағлуб

Мусобқа жадвалида бир-бирига максимал даражада яқин жойлашган клублар “Истанбул Башакшеҳир” ва “Гёзтепе” ўзаро беллашишди. Ўйин кутилганидек, қизиқарли ва кескин курашлар остида ўтди ва унда кўҳна шаҳар жамоаси бўлган истанбулликлар минимал ҳисобда ғалаба қозонишди. Голларга, ғолиб томон вакилларидан Гулбрандсен ва вақтида “Ливерпуль” шарафини ҳимоя қилиб, ҳавас қилса арзигулик катта ютуқларга эришган тажрибали ҳимоячи Мартин Шкртел сўнгги сонияларда киритган ғалаба тўпи билан муаллифлик қилишди. Бунга, меҳмонлардан Сонер Айдогду биргина голи орқали жавоб қайтарди. Шу тариқа, Измир шаҳри клуби рақобатчисини қувиб етиш имкониятидан фойдалана олмади.

Трабзонда навбатдаги ғалаба

Сўнгги пайтларда, муваффақиятли одимлаётган жамоалардан бири “Трабзонспор” бу сафар ўз уйида ўтган турда мухлислари қаршисида истанбулликлардан енгилган бечораҳол “Газиантеп”ни аяб ўтирмади ва рақибини 4:1 кўринишида маҳв этди. Голларга келсак, мезбонларнинг кўпчиликка маьлум ва машҳур бўлган голни нишонлаш бўйича антиқа “қўғирчоқ” услубига эга супер форварди Даниэл Старриж ҳисобни очиб берди. Яна Сёрлот, Юсуф Сари ва вақтида “Милан”да ўйнаган Хосе Эрнесто Соса биттадан тўп киритишди. Газишеҳирликлардан эса, ягона голга Жефферсон муаллифлик қилди. “Трабзонспор” қаторасига эришилган учта ғалабадан кейин, 2-ўрингача кўтарилиб олди.

Анқара ва Истанбул тўқнашувида дуранг

Шанба кунги ўйинларнинг сўнггисида ҳозирда ўзига ярашмаган ўринларни банд этиб турган икки буюк тарихга эга клублар “Анқарагюжю” ва “Бешиктош” ўзаро тўқнаш келишди. Тенгма-тенг курашларга бой ўтган учрашувда ҳисоб очилмади. Ҳар иккала жамоа футболчиларида ҳам гол уриш учун бир қатор қулай имкониятлар юзага келди. Бироқ, нурсиз дуранг қайд этилишининг бош сабаби томонлар айнан яратилган вазиятлардан самара чиқаришда оқсашгани билан боғлиқ. Ушбу натижадан сўнг, жамоалар турнир жадвалида тегишлича кетма-кет 12-13-поғоналарга жойлашишди.

Аутсайдерлар жангида муроса

Жорий мавсумни жуда суст бошлаган ва турнир жадвалининг қуйи қисмида изғиб юрган жамоалар “Қайсариспор” ва “Қосимпошо” ўзаро баҳс олиб боришди. Учрашувга тўхталсак, қескин тортишувларга тўла бўлган ўйинда ҳар иккала жамоа вакилларига нақ саккизта сариқ карточка кўрсатилди ва натижада томонлар 1:1 ҳисобидаги дурангга имзо чекишди. Аввалига, меҳмонлар Маме Тиам 6-дақиқада урган голи эвазига олдинга чиқиб олишди. Аммо, Педро Энрике иккинчи бўлим бошларида тўп киритди ва жамоасини мағлубиятдан қутқариб қолди. Бу баҳс натижасига кўра, мезбонлар оҳирги ўринга мустаҳкамроқ жойлашишди. Қосимпошоликлар бўлса, “қизил чизиқ” ёқасида туришибди.

Шавқат билмас етакчи

Олдинги тур доирасида, мамлакатнинг узоқ йиллик гигант клубларидан бири бўлган “Бешиктош”дан енгилган мусобақанинг ҳозирги карвонбошиси “Аланяьспор” бу сафар ўз майдонида қаторасига тўртинчи ўйинда ҳам мағлубият кўчасига кирган “Ризеспор” устидан ортиқча қийинчиликларсиз ғалабага эришди. Голларга, мезбонлардан бир вақтлар Англия Премьер-лигаси тўпурарлари рўйхатида етакчилар қаторида юрган Паппис Сиссе “дубль” қайд этди. Жайхун Гюлселам, Бакасетас ва Фернандеслар биттадан гол уришди. Ризе шаҳри жамоасидан эса, Фернандо Болдрин киритган иккита тўпи билан фақатгина ҳисобни қисқартиришга муваффақ бўлди.

Дебютант яна мағлуб

Мана учинчи ўйиндирки, мағлубият домидан чиқиб кета олмаётган ва тобора жарликка шўнғиётган аянчли ҳолатдаги “Денизлиспор” бу сафар ўз мухлислари қаршисида ўйнаб, мусобақанинг кучли иштирокчиларидан бири бўлган “Фенербахче”га ютқазиб қўйди. Ўйинга келсак, Толга Жигержи ҳисобни очди ва меҳмонларни олдинга олиб чиқди. Иккинчи бўлимнинг 62-дақиқасида чемпионатнинг кўзга кўринган вингерларидан бири Ведат Мурики ўртадаги фарқни иккитага оширди. Эступиньан томонидан киритилган гол Денизли шаҳри жамоасига умид бағишлаганди. Бироқ, уларнинг кучи бундан ортиғига етмади.

Рақобатчилар тўқнашуви

Турнир жадвалида бир-бирига жуда яқин жойлашган ва ўтган турда йирик ғалабаларни нишонлаган клублар “Коньспор” билан “Йени Малатьспор” ўзаро жанг олиб боришди. Учрашувда, Серген Ялчин шогирдлари ишончли ҳисобда ғалаба қозонишди. Киритилган голларга, жамоанинг тажрибали аьзоси Гильерме ва бош мураббийнинг адаши бўлган ёш умидли ярим ҳимоячи Робин Ялчин муаллифлик қилишди. Ушбу муваффақият орқали, малатьяликлар асосий рақобатчиларини жадвалда ортда қолдиришди. Мезбон жамоа “Коньяспор” эса, омадсиз якунланган баҳсдан кейин 4-ўриндан тўрт поғона пастлади.

Хондамир Ҳакимов