Vladimir Bubanya: “Yangi bosh murabbiy Bahrom Haydarov haqida biror narsa deya olmayman, chunki...”

Karantin jamoaga va futbolchilarga xatolarni ko'zdan kechirib olish uchun qay darajada foyda beradi? Biz bu borada jamoaning serbiyalik legioneri Vladimir Bubanyaning fikrlari bilan qiziqdik.

“Hozirda karantinni uyimda, oilam davrasida o'tkazyapman. Murabbiylar har bir futbolchiga uyda individual shug'ullanishi uchun alohida dastur yuborishgan. SHu dastur asosiyda o'zim yakka tartibda mashg'ulotlarni olib boryapman. Asosan mashqlar jismoniy tomondan o'zimizni ushlab turishimizga yo'naltirilgan. Hozirda, hech bir jamoada jamoaviy shug'ullanishni imkoni yo'q. O'ylashimcha, klubdagi barcha futbolchilar jim o'tirmayapti. Hammasi belgilangan vazifani bajarmoqda. Jamoadoshlarim bilan aloqada bo'lib turibmiz doim. Umid qilamanki, biz karantindan so'ng yanada kuchli bo'lib qaytamiz va darajamizni saqlab qolamiz.

Yangi bosh murabbiy Bahrom Haydarov haqida biror narsa deya olmayman. CHunki, ushbu mutaxassis bilan ilk bor birga ishlamoqdaman. Hamjihatlikda yuqori marralarni zabt etishimizga ishonaman. Biz dastlabki uchta turda yaxshi va chiroyli futbol ko'rsatishga intildik. Natija esa qoniqarsiz ko'rinish oldi. Superliga bahslari davom ettirilgach xatolarimizni takrorlamaslikga va qimmatli ochkolarni jamg'arish uchun bor kuchimizni ishga solamiz. Muxlislarni yana g'alabalar bilan xursand qilishga, ularga yoqadigan o'yin namoyish qilishga harakat qilamiz. Jamoamizning jonkuyar muxlislariga sog'lik va salomatlik tilab qolaman”,- deydi Bubanya.

Abdulaziz Iskandarov yozib oldi