Futzal. Yaponiyaga yutqazib ikkinchi bo'lishimiz kerak edimi?

Balki chiqa olardi, lekin Tailand bizdan ko'ra ancha kuchli raqib va yaponlarning hiylasi avvalo bizga ko'proq foyda berdi. Ko'pchilik O'zbekiston terma jamoasining bugun qayd etgan natijasidan kelib chiqib murabbiylar shtabini keskin tanqid qilyapti. O'ylaysizki, guruhda ikkinchi o'rinni olganimizda biz hozir yarim finalda Quvaytga qarshi o'ynarmidik? Yo'q albatta, bizning yigitlar allaqachon Toshkentga etib kelgan bo'lardilar.

Tailand terma jamoasi Eronni Osiyo Kubogida ikki marotaba mag'lubiyatga uchratib finalga chiqqan. So'nggi Osiyo chempionatida aynan Tailand terma jamoasi Eronni finaldan mahrum qilganini hamma ham bilmasa kerak.

Tailand terma jamoasi 13 marta Osiyo chempionatida ishtirok etgan. Ikkita kumush, 4ta bronza. CHakki natija emas, to'g'rimi?

Tailand futzalchilari 4 karra JCH ishtirokchisi! 2012 yil shu mamlakatda bo'lib o'tgan musobaqada Tailand terma jamoasi guruhdan chiqa olgan. 1/16 finalda esa yakunda finalga qadar etib borgan Ispaniyaga imkoniyatni boy berdi.

Undan keyin bu O'zbekiston milliy terma jamoasini to'liq tarkibi emasligini ham unutmasligimiz lozim. Eliboev, SHaripov va Irsaliev kabi etakchi futzalchilarimiz musobaqaga bormaganlar.

"Afsuski, jarohat tufayli bu musobaqada ishtirok eta olmayapman. Do'stlarim va ukalarimga esa qiziqarli chempionat uchun rahmat aytishim mumkin. Haqiqatdan ham Tailandga tushsak maqul bo'lardi degan gaplarni eshityapmiz. Ammo unutmaslik kerakki, Tailand terma jamoasi JCHlarda pishgan jamoa. U erda futzal juda rivojlangan. Muhimi, "Lokomotiv" uchun OCHL yo'llanmasi yutildi", - deydi Dilshod Irsaliev.

Aslida musobaqada guruhdan chiqa olish haqida o'ylayotgan edik. Hattoki, "Lokomotiv" OCHLda ishtirok etmasligi uchun O'zbekiston terma jamoasi atayin guruhda qolishni rejalashtirgan degan gaplar ham chiqdi. Balki Erondan yirik hisobda mag'lubiyatga uchragandirmiz, ammo "Lokomotiv" uchun OCHL masalasini ijobiy hal qildik.

Eron esa bu boshqa masala, xorijlik mutaxassislar aytganidek, Eronda yangi tug'ilgan chaqaloqqa futzal to'pi sovg'a qilinadi.

SHunday ekan, futzalchilarimizni koyimaylik! Muxlislarga esa alohida rahmat! Hatto vetnamliklar ham O'zbekiston deb baqirib yuborishdi.

Nodirxo'ja Yuldashev.