“Динамо” – “Нефтчи”. Фарғоналикларнинг ғалабали юриши давом этадими?

Андрей Фёдоров бошчилигидаги “Нефтчи” жамоаси айни пайтда кўҳна Самарқандда бўлиб турибди. Фарғоналикларнинг бу турдаги рақиби Баҳром Ҳакимов мураббийлигидаги “Динамо” жамоаси. Фёдоровнинг жамоа постига келиши омадли кечмоқда. Мураббий бошчилигида “Нефтчи” сафарда “Сўғдиёна”ни ютди, Фарғонада “Бунёдкор” таслим этилди. Умумий қилиб айтганда, иккинчи давранинг ўрталарига келиб Фарғона клуби ўзига келяпти. Яхши биласиз, “Динамо”нинг амалдаги устози Баҳром Ҳакимов асли Фарғона вилояти фарзанди ҳисобланади.

Хуллас, ўзига хос тўқнашув. Биринчи даврада “Динамо” “Истиқлол” аренада “Нефтчи”га мағлуб бўлганди. Аммо ўша баҳсда самарқандликлар ўзларини яхши тарафлама кўрсатганди. Мозийга назар ташлашда давом этамиз, “Нефтчи” сўнгги марта Самарқанд шарҳига Мурод Исмоилов устозлигида сафар қилганди ва бу юриш нурсиз якунланганди. 2014 йилги “Динамо” – “Нефтчи” рақобатида ҳисоб очилмаганди. “Динамо” Самарқандда яхши ўйнайди. Сўнгги пайтларда, Ҳакимов бошчилигида Самарқанд клубининг ўйинида ижобийлик кўринмоқда. “Динамо” ҳали ҳамон хавфли зонада. Мазкур жамоага очко жуда зарур. “Нефтчи”да вазият ёмон эмас. Кетма-кет муҳим ғалабалардан сўнг жамоанинг ўзига бўлган ишончи ортмоқда. Таҳминларга қараганда, бугунги баҳсда дуранг қайд этилади. Билмадик. Майдон такис, ер юмалоқ. Самарқандаги ўйин бугун бўлиб ўтади. “Нефтчи” ОЧЛга чиқиш учун қаттиқ курашмоқда. Бу борада фарғоналикларнинг имконяти ёмон эмас.

Самарқанддаги ўйиндан сўнг “Нефтчи”ни “Пахтакор” ва “Насаф”га қарши кийин баҳслар кутяпти. Қандайдир маънода, “Нефтчи” учун мавсумнинг ҳал қилувчи вақти келди. Ҳаммасини вақт кўрсатади.  Фарғона клуби мухлислари ўз жамоаларидан фақат битта нарса кутишмоқда: ОЧЛ йўлланмаси! Бу борада “Бунёдкор” “Нефтчи”га асосий рақиб бўляпти. “Бунёдкор” бир текисда, мағлубиятларсиз мавсумни тугатиб олса ОЧЛ нақд, “Нефтчи” эса “Пахтакор” ва “Насаф” тўсиғидан ўтиши керак бўлади. Вақт – олий ҳакам. Буёғининг кўрайликчи, ким кейинги йили ОЧЛда ўйнаркин...?

Ҳожиакбар Жабборов