"Навбаҳор" биринчи даврани кетма-кет саккиз ўйинда ғалаба қозонмай тугатди
26 июн 2017 13:22
Янгиликлар

"Навбаҳор" биринчи даврани кетма-кет саккиз ўйинда ғалаба қозонмай тугатди

Аксарият клублар учун олий лиганинг биринчи давраси ўз якунига етди. Кеча "Насаф"дан 0:4 ҳисобида мағлуб бўлган "Навбаҳор" мавсумнинг биринчи ярмини 11-ўринда тугатди.

Қолаверса, "Навбаҳор" кетма-кет саккиз ўйинда ғалаба қозона олмади. Жамоа сўнгги бор ўз майдонида "Шўртан"ни 1:0 ҳисобида мағлуб этганди. Кейин "Навбаҳор" Тошкентда "Пахтакор" меҳмони бўлди ва ҳаммаси шундан бошланди . Умуман кулгули автогол туфайли жамоа ютқазиб қўйди.

Бу ўйиндан сўнг наманганликлар кетма-кет тўртта учрашувда дуранг ўйнашди. Шу дуранглардан учтаси уйдаги баҳсларда қўлга киритилди. Жамоа ўз майдонида "Локомотив", "Қўқон-1912" ва "Бунёдкор" қаршилигини енга олмади. Мўминжонов шогирдлари сафарда "Насаф" ва "Сўғдиёна"га имкониятни бой берган бўлишса, уйда "Олмалиқ" билан яна дуранг ўйнашди.

"Навбаҳор" ўз майдонидаги ўйинларда мағлуб бўлмади: уч ғалаба, беш дуранг. Тўплар нисбати 10-7. Сафарда эса "Навбаҳор" фақат битта баҳсда зафар қучди. Наманганликлар 4-турда "Динамо"ни мағлуб этиб қайтишди.