Мбаппенинг текинга "Реал Мадрид"га ўтиши хомхаёл

"Реал" 22 ёшли французни бу йил ёзда 200 миллион евро таклиф қилган бўлсада, сотиб ололмади.

Энди Мадрид клуби Мбаппени кейинги ёз эркин агент мақомида қўлга киритмоқчи, аммо клубдагилар бу вариантда ҳам яхшигина харажат қилиш зарурлигини тушуниб туришибди. 

"Реал" футболчига тарихдаги энг катта трансфер бонуси тўлашга тўғри келиши мумкинлигини тахмин қилмоқда. Аниқ рақамларни топиш мушкул, аммо вазиятга яқин манбааларнинг айтишича, Килианнинг эркин агент сифатида "Қироллик клуби"га кўчиб ўтиши 80 миллион еврога – бу суммага бонуслар ва комиссия пуллари киради, тушиши кутилмоқда.

Бироқ бу вазиятда ПСЖ ўзини қандай тутиши номаълум. Клуб етакчиларидан бирини шунчаки қўйиб юборишни истамаслиги турган гап. Ҳозирги вақтга келиб, Мбаппе шартномани узайтириш борасида 6та таклифни рад этди.