– Ўйин ҳақида...
– Биринчи навбатда мухлисларимизга миннатдорчилик билдираман. Фарғонадан келиб, доимий равишда бизни қўллаб-қувватлашяпти. Ғалаба билан барчани табриклайман. Ўйлайманки, яхши ўйин бўлди. Иккала жамоа ҳам ҳужумкор ўйин кўрсатишга ҳаракат қилди. Агар вазиятлардан тўлиқ фойдаланганимизда, ҳисоб бундан ҳам йирикроқ кўринишга келиши мумкин эди.
– "Нефтчи" ўтган тур ўз майдонида азалий рақиб "Пахтакор"га мағлубиятга учради. Жамоани мазкур учрашувга психологик жиҳатдан тайёрлаш қанчалик қийин кечди?
– "Пахтакор" билан ўйиндан кейин футболчилар билан гаплашдик ва мағлубиятни тезроқ унутиб, навбатдаги ўйинга тайёргарлик кўриш кераклигини тушунтирдик. Мағлубият футболда учраб турадиган ҳолат. Жамоа буни тўғри қабул қилди. "Пахтакор"га қарши ўйинда ҳам ёмон ҳаракат қилмагандик. Ўйинлар ораси қисқа бўлгани учун, кўпроқ эътиборни тикланишга қаратдик ва футболчилар бугунги ўйинга юз фоиз тайёр ҳолатда тайёр бўлиб келишди.
– Жамоа кейинги ўйинда "Насаф"га қарши ўтказади. "Насаф" иштирокидаги охирги иккита ўйинида ҳакамлар билан боғлиқ вазиятлар диққат марказида бўлиб турибди. Кейинги муҳим ўйинда ҳам ҳакамлар натижага таъсир қилиб қолиши мумкинлиги хавотирга солмаяптими?
– Бу "Насаф" билан содир бўлаётган ҳолат.
– Масалан, "Нефтчи"нинг "Пахтакор"га қарши ўйинларда ҳам баҳсли ҳолатлар бўлганди.
– Бу футболнинг бир қисми. Шунинг учун бизнинг вазифамиз максимал даражада ҳаракат қилиш ва ўз ўйинимизни намойиш этиш. Футболда ҳар хил ҳолатлар бўлиб туради. Шуниси билан қизиқ. Ҳаммасини вақт кўрсатади.
– "Нефтчи" деярли барча ўйинларда тўп назоратида ҳам, пасларда ҳам устунлик қиляпти, лекин бир жиҳат эътиборимни тортди. Охирги учта-тўртта ўйинни олсак, "Нефтчи" рақибларига нисбатан кўпроқ фол ишлатаётган экан, ҳатто йирик ҳисобда мағлуб этилган "Қизилқум"га қарши ўйинда ҳам. Бу рақибнинг тезкор ҳужумини олдини олиш учун махсус тактик ишланмами ёки футболчиларнинг хатоси эвазига юзага келаётган ҳолатларми?
– Биз юқори чизиқ бўйлаб ўйнашга, доимий равишда ҳужум уюштиришга ҳаракат қиляпмиз. Шунинг учун орқада жуда катта бўшлиқлар қолади. Агар рақиб тезкор қарши ҳужумга чиқиб кетадиган бўлса, бўшлиқлардан бемалол фойдалана олади. Шунинг учун бу тактик ҳолат билан боғлиқ. Ўша вазиятдан келиб чиқиб, имкон даражасида фолсиз тўпни қайтариб олишга ҳаракат қиламиз. Агар имконият бўлмаган тақдирда, фол ишлатишга мажбур бўламиз. Шунинг учун фоллар кўплиги бу жамоа юқорида ўйнаётганидан далолат. Агар дарвозага яқин ўйнайдиган бўлсангиз, автоматик тарзда сизда фоллар камаяди. Чунки футболчилар дарвозага яқин ҳолатда бўлганида камроқ фол қилишга ҳаракат қилади. Кўпроқ ҳужум ташкил этаётганимизни инобатга олсак, бу тактик ҳолат билан боғлиқ.
– "Нефтчи" "Пахтакор"га қарши ўйинда тўққизта зарба йўллаб, гол уролмади, бугун ҳам йигирма иккита зарбадан битта гол урилди. Реализацияни нисбатан яхшироқ қилишда нима етишмаяптими?
– Ундай демаган бўлардим. Турнир жадвалига қарасангиз, биз шу пайтгача нечта гол урдик? Агар бу реализация мавжуд бўлмаганда, қолган ўйинларда биз имкониятлардан фойдаланмаган бўлардик. Жамоада потенциал бор. Лекин бу дегани, сиз доимий равишда учта, тўртта гол урасиз дегани эмас. Бугун, масалан, бемалол таъкидлаб ўтиш керак, "Бунёдкор" дарвозабони ажойиб тарзда ҳаракат қилди. У бугун менимча учрашувнинг энг яхши футболчиси бўлишига ҳам номзод деб бемалол айта оламан. Чунки жамоасини бир неча бор муқаррар голлардан сақлаб қолди. Биз ҳаракат қилдик, ҳар битта футболчи ҳаракат қилади вазиятдан фойдаланиш учун, машғулотларда бу борада жуда кўп ишлаймиз. Лекин бу футбол, шуниси билан қизиқ. Агар ҳар битта зарба гол билан тугайдиган бўлса, унда ўйинлар ҳисоби йирик ҳисобда тугашига тўғри келади.
– Май ойида Ўзбекистон терма жамоаси йиғини бошланади. "Нефтчи"дан ҳам бир нечта футболчи чақирилади. Шу билан бирга, кубок ўйинлари ҳам ўтказилади. Кубок ўйинларида қандайдир ротациялар қилиш ниятингиз борми ёки натижага урғу бериладими?
– Биз ҳар ўйинда ротация қиляпмиз.
– Тўғри, мен нисбатан камроқ ўйнаётган, яъни ёшроқ ўйинчиларни назарда тутгандим.
– Албатта, кубок ўйинларида ёшларга имконият берамиз. Асосий эътиборимиз ёшларга қаратилган. Клуб босқичма-босқич ёшларни аста-секинлик билан катта футболга олиб кириш учун жуда кўп ишларни амалга оширяпти. Шунинг учун кубок ўйинларида аста-секинлик билан ёшларга имконият берамиз.
