Ғарбий Осиё Чемпионати. Фаластин 2-турни ўтказди, Ливан эса Сурия билан ўйнади

Кеча, Фаластин терма жамоаси мезбонларга қарши тўқнаш келиб, 1:2 ҳисобида имкониятни бой берди. Фаластинликлар ярим ҳимоячиси Ислом Батран иккинчи дақиқада белгиланган пенальтини аниқ амалга ошириб, ҳисобни очган бўлса, ироқликлар Муҳаннад Абдулраҳим ҳамда Ҳусайн Алининг голлари эвазига мувозанатни ўз томонларига оғдиришди. Нуриддин Улд Али шогирдлари мусобақа доирасидаги илк баҳсда Яманни таслим (1:0) этишганди. Ироқ эса очилиш учрашувида Ливанни минимал ҳисобда (1:0) енганди.

Бугун, Ливан 2-тур доирасида Сурияга қарши тўқнаш келиб, 2:1 ҳисобида зафар қучди. Ливан сафида голларни Нодир Матар ва Мони урган бўлса, рақиб ярим ҳимоячиси Аҳмад ал-Дуни эса жавоб тўпини киритди. 

Эртага,  «B» квартетидан ўрин олган учрашувлар бўлиб ўтади. Иордания термаси Баҳрайнга қарши тўқнаш келса, Саудия Арабистон эса Қувайт билан ўйнайди.

Умуман гуруҳ босқичи 11 август куни ўз якунига етади. Гуруҳларда пешқадамликни қўлга киритган терма жамоалар турнир ғолиблиги учун ҳал қилувчи ўйинда майдонга тушишади.