Fayzulla Qambarov: "Omadimiz kelmasa, yulduzli tarkib bilan ham aytarli natijaga erishish qiyin"

SHiddatli va murorasiz kechgan uchrashuvda maydon egalari 2:1 hisobida g'alaba qozondi. Bu o'yinga qadar klub ishtirokida asosan durang natijalar qayd etilayotgandi. Xo'sh, “Qizilqum” mavsumni qaysi o'rinlarda tugatish uchun kurashmoqda? Bunga javob olish maqsadida klubning etakchi futbolchisi Fayzulla Qambarov bilan suhbatlashdik.

- Superliga doirasida oxirgi marotaba Bekobodda kechgan bahsda g'alaba qozongandik, - deya gap boshladi Qambarov. G'alabamizni muxlislarimiz ancha kutib qolishdi. Ketma-ket durang natijalardan zerikkandi. “Turon” ustidan qozonilgan g'alabadan so'ng futbolchilar va muxlislarimizning ham kayfiyatlari haminqadar ko'tarildi. “Turon” bilan bahs ancha qiyin kechdi. Har holda ular Superligada qolish uchun kurashmoqda.

Ketma-ket durang natijalar haqida
- Darhaqiqat, bu mavsumda eng ko'p durang o'ynagan jamoa bo'lib turibmiz. Menimcha, ko'p durang qayd etilayotganiga o'yinlarda omadimiz kelmayotgani bilan bog'liq deb o'ylayman.

Sovrinli o'rinlar uchun kurash to'g'risida
- Biz haligacha bu maqsadimiz yo'lida qaytganimiz yo'q. Mavsum boshida yuqori o'rinlarning birini qo'lga kiritish uchun kurashga qo'shilgandik. Afsuski, keragidan ortiq ochkolarni qo'ldan chiqarganimiz tufayli ochkolarimiz sonida pasayish kuzatildi. Ikkinchi davrada ko'plab o'yinlarda durang o'ynadik. Lekin oldimizda turgan bahslarda ijolbiy natijalar ko'rsata olsak bo'ladi. Hali imkoniyat to'liq qo'ldan boy berilgani yo'q.

Tarkib borasida
- CHindan ham bu mavsumda tarkibimiz ancha kuchaytirildi. Eng mahoratli futbolchilar jalb qilindi. Bu yigitlar ham “Qizilqum” bilan sovrinli o'rinlarning birini egallab, kelgusi mavsumda xalqaro maydonda to'p tepish imkoniyatiga ega bo'lishni niyat qilgan. Lekin futbolda omadga ko'p narsa bog'liq. Omadimiz kelmasa, yulduzli tarkib bilan ham aytarli natijaga erishish qiyin.

Maydondagi roli haqida
- O'ylashimcha, hech bir futbolchi mavsum davomida ko'rsatgan o'yinidan to'liq qoniqish hosil qilmaydi. Jumladan, men ham. Ko'proq jamoaga yordam berishni istayman.