Agar "CA" xodimlari futbolchi bo'lganida...
17 apr 2020 18:47
Yangiliklar
![](https://championat.asia/upload/storage/560284_original.jpg)
![](/upload/storage/560284_220.jpg)
Agar "CA" xodimlari futbolchi bo'lganida...
Endi buni maqola deb bo'lmaydi. SHunchaki karantin paytida miyaga kelib qolgan bir fikr. Tasavvur qiling, saytimiz xodimlari futbolchi bo'lganida kimga o'xshashardi. Quyida "SA" vakillarining xarakteri va o'zini tutishidan kelib chiqib qaysi futbolchiga o'xshashini keltirib o'tamiz.
Kamoliddin Alimov - Sol Kempbell
"Arsenal"da o'ynagan Sol Kempbellni yaxshi eslasangiz kerak. Markaziy himoyachi edi. Angliya terma jamoasida ham uzoq yillar to'p tepgan. Kamoliddin Alimov xarakteri jihatdan shu futbolchiga o'xshab ketadi: gavdali, og'ir-bosiq va vazmin.
Narzulla Saydullaev - Gabor Kiray
Vengriyalik darvozabon Gabor Kiray 43 yoshida faoliyatini tugatdi. U Evro-2016 paytida 42 yosh bo'lib, musobaqaning eng faxriy futbolchisi bo'lgandi. Narzulla ham ushbu darvozabonga o'xshab ko'p yillar sayt uchun ishlashni maqsad qilgan.
SHahboz Beg'amov - SHtefan Effenberg
Beg'amovning turgan bitgani nemis. O'z paytida "Bavariya" etakchisi va sardori bo'lgan Effenbergga o'xshab ketadi. Bir qarasang jim turadi, bir qarasang jahli chiqib "portlaydi". Effenberg ham o'z paytida shunaqa xarakterli futbolchi edi.
Tolibjon Qosimov - Rahim Sterling
Tolibjon ham Sterlinga o'xshab qora mag'izdan kelgan, bo'yi kichik, lekin chayir yigit. Ish kunlari hatto Zangiotadan erinmay piyoda keladi. Juda abjir va harakatchan. Bir joyda ushlab o'tirish qiyin. Futbol o'ynaganda oyoq tagida ko'p o'ralashadi.
Zoir Tursunboev - Maykl Karrik
Video tasvirchimiz Zoir Tursunboev kamgap, beozor va jimgina o'z ishini qiladigan yigit. Bu tomonlama Maykl Karrikka o'xshab ketadi. Balki ofisga kelgani ham bilinmas, lekin katta hajmdagi ishni bajaradi. Karrik ham o'yinchilik paytida ko'p ko'zga tashlanmasdi.
Nodirxo'ja Yuldashev - Luis Enrike
Sayt direktori Nodirxo'ja Yuldashev saytimiz shu darajaga chiqishida juda ko'p mehnat qildi. U xuddi futbolchi va murabbiy Luis Enrikega o'xshab ishlaydi. "Barsa"da 21-raqamda o'ynagan Enrike yodingizdami? Jamoani ortidan ergashtirishni biladigan futbolchi edi.
Aziz Nuriy - Antonio Valensiya
MYUda to'p tepgan ekvadorlik Antonio Valensiya o'zimizning Nuriyga o'xshab ketadi. Valensiya qariyb 10 yil "Manchester Yunayted"da o'ynab atigi 17ta gol urgan ekan. Aziz Nuriy ham maqola yozganida kam "gol uradigan" jurnalistlardan biri.
Jasur Aslanov - Ivan Rakitich
Ivan Rakitich juda odobli futbolchi. Jasur Aslanov ham kamtarin va odobli bola. Bir aytganingizni ikki qilmaydi. Maqola yozishda erinmay malumotlarni o'rganib chiqadi. Tezroq chiqarsam bo'ldi demaydi. Bu tomonlama uning mehnati Ivan Rakitichnikiga o'xshab ketadi.
Aziz To'xtamurodov - Eden Azar
Balki Eden Azar futbolda Messi, Ronaldu erishgan yutuqlarga aslo erisha olmas, lekin baribir ajoyib futbolchi bo'lib qolaveradi. Saytimizning ukasi "Olamsport" etakchilaridan biri Aziz To'xtamurodov ham bu jihatdan Azarga o'xshab ketadi. Ishdan umuman charchamaydigan yigit.
Omonjon To'xtamirzaev - Tomas Gravesen
Omonjon o'zi "Real"ning ashaddiy muxlisi. Saytimizning ruscha versiyasiga masul shaxs. SHu bois uni bir paytlar "Real"da o'ynagan Tomas Gravesenga o'xshatdim. Gravesen "Real"da ko'p o'ynamagan, atigi bitta gol urgan ekan. Omonjon ham bitta gol urgandir.
Jahon Fayzullaev (Petash) - Lyudovik Jyuli
"Monako"dagi tinib tinchimas Jyuli esingizdami? Hech charchamaydigan, oxirigacha yuguradigan futbolchi edi. Keyinchalik "Barsa"da ham o'ynagan. Bizning Jahongir mana shu futbolchiga o'xshab ketadi. Ishdan sira charchamaydi, faqat topshiriq bersangiz bas.
Abdulaziz Iskandarov - Yan Koller
Bo'yi 2 metrdan uzun futbolchi bo'lardi: Yan Koller. Abdulaziz ham katta bo'lsa xuddi Yan Kollerdek bo'ladi. O'zi 2001 yil tug'ilgan, lekin bo'y ham 190 bor-ov. Koller "Borussiya Dortmund"da harqalay yaxshi o'yin ko'rsatgandi. Abdulazizdan ham shunday ijod kutib qolamiz.
Gayrat Xasbiullin - Loran Blan
Bir so'z bilan aytganda, boss. Sayt xo'jayini va sardori. 1998 yilgi JCHda Franciya terma jamoasi kubokni yutishida Loran Blanning mehnati qancha bo'lsa, sayt rivojiga Gayrat Xasbiullin ham shuncha hissa qo'shib kelyapti. 5-raqamda o'ynagan Loran Blan juda tartibli markaziy himoyachi bo'lgan.
Alisher Ostonov - Alvaro Morata
Alisher Ostonov "Atletiko" muxlisi. Xarakteri ham Alvaro Moratanikiga o'xshab ketadi. Odobli yigit. Ko'p gapirmaydi va o'zidan kattalarga sakramaydi. Morataga o'xshab kam gol uradi, lekin bir urganda nishonga tekkazishga harakat qiladi.
P.S. Albatta, "Championat.asia" faqat shu jurnalistlardan iborat jamoa emas. Saytda juda katta auditoriya ishlaydi. Bir qator viloyat muxbirlarimiz ham yordam berib kelishyapti. Faqat bu o'rinda men o'zim ko'proq yaqindan bilgan insonlarga to'xtaldim va barcha o'xshatishlarni o'ta shaxsiy deb qabul qilgaysiz.
O’xshash yangiliklar
![AMP Logo](https://championat.asia/image/logo-amp.png)
Fikrlar