the-uff.com: Ўзбекистон миллий терма жамоаси Иордания пойтахтига етиб борди

Миржалол Қосимов бошчилигидаги Ўзбекистон миллий терма жамоаси Иордания қарши саралаш плей-офф учрашувини ўтказиш учун Иордания пойтахти Амман шаҳрига етиб борди. Қосимов шогирдлари 6 сентябрь куни Аммандаги «Қирол Абдуллоҳ» стадионида Иорданияга қарши ЖЧ-2014 саралаш плей-оффи дастлабки учрашувида майдонга тушади.

Айни дамда Ўзбекистон миллий терма жамоаси делегацияси Аммандаги «Grand Hayyat» меҳмонхонасига жойлашган.

Маълумот ўрнида, миллий терма жамоа бош мураббийи Миржалол Қосимов Амманга жами 23 нафар футболчи билан йўл олган. Иорданияга йўл олиш арафасида Тошкентнинг «Пахтакор» клуби ҳужумчиси Игорь Сергеев миллий терма жамоа сафига қўшилган. «Локомотив» ҳужумчиси Иван Нагаев эса, Тошкентда қолган.

Эслатиб ўтамиз, Иордания ҳамда Ўзбекистон миллий терма жамоалари ўртасидаги ЖЧ-2014 саралаш плей-офф дастлабки учрашуви 6 сентябрь куни Амман шаҳрида бўлиб ўтади. Ўйин Тошкент вақти билан соат 21:00да бошланади.