Суперлига. "Насаф" - "Қизилқум" ўйинига оид маълумотлар

"Насаф" ўз майдонида Навоийнинг "Қизилқум" клубини қабул қилади. Учрашув 20:00да бошланади. Қуйида ушбу ўйинга доир баъзи маълумотларни келтириб ўтамиз. 

"Насаф"

- "Насаф" турнир жадвалида 10 очко билан 5-ўринни эгаллаб турибди. Жамоа учтадан ўйинда ғалаба қозонган ва мағлубиятга учраган. Бир марта дуранг қайд этган. Тўплар нисбати 11-8. 

- "Насаф" охирги икки турни ғалаба билан тугатди. Жамоа Андижонда имкониятни бой берганидан сўнг ўз майдонида АГМК, сафарда "Бухоро"ни мағлуб этди. 

- "Насаф" охирги икки учрашувда ўз дарвозасидан гол ўтказмади. Тўплар нисбати 5-0. 

- Бугун "Насаф" ўз майдонида тўртинчи ўйинини ўтказади. Аввалги учта баҳснинг иккитасида жамоа ғалабага эришиб, бир бор мағлуб бўлган. 

- "Насаф" Қаршида ҳали дуранг қайд этгани йўқ. 

"Қизилқум"

- "Қизилқум" 8 очко тўплаб мусобақа жадвалида 9-ўринда боряпти. Бу жамоа иккитадан ғалаба ва дуранг қайд этиб, уч бор мағлубиятга учраган. Умумий тўплар нисбати 8-11.

- "Қизилқум" қаторасига учта мағлубиятдан сўнг ўтган турни ғалаба билан якунлади. Ҳамиджон Актамов шогирдлари уйда "Бунёдкор" устидан 1:0 ҳисобида зафар қучишди.

- "Қизилқум" ушбу мавсум бошидан бери сафарда ҳали ғалаба нашидасини сургани йўқ. Навоийликлар икки бор мағлубиятга учраб, бир марта дуранг қайд этишди. 

- "Қизилқум" сафар ўйинларида ўз дарвозасидан 8та гол ўтказди ва бу борада "Қўқон-1912" (-13 гол) ва АГМК (-9 гол)дан кейин учинчи ўринда боряпти. 

Охирги 5 ўйин 

2018 йил. Иккинчи босқич. "Насаф" - "Қизилқум" 4:2

2018 йил. Биринчи босқич. "Насаф" - "Қизилқум" 0:0

2017 йил. "Насаф" - "Қизилқум" 2:0 

2016 йил. "Насаф" - "Қизилқум" 2:0 

2015 йил. "Насаф" - "Қизилқум" 3:1 

Қаршида кечган охирги 5та ўйиннинг тўрттасида омад "Насаф" томонида бўлган. Фақат бир марта 0:0 қайд этилган. Қизиғи шундаки, "Насаф" охирги тўртта ғалабасини иккита тўп фарқи билан қўлга киритган. "Қизилқум" охирги беш ўйинда рақиб дарвозасига фақат 3та гол урган.