Маъсуд Тоиров: "Мирхолдиршаев, Холмуродов, Ирисметов, Гейнрих ўша даврнинг энг кучли ҳужумчилари эди"

Хусусан, навбатдаги мулоқот иштирокчиси жамоанинг таниқли собиқ футболчиси Маъсуд Тоиров бўлди. Мухлислар билан ташкил этилган суҳбат жараёни савол-жавоб кўринишида эътиборингизга ҳавола этилмоқда.

- Ассалому алайкум, Маъсуд. Онлайн мулоқотимизга хуш келибсиз! Айтингчи, ҳозирги кунда нималар билан бандсиз?

- Ассалому алайкум. Таклиф учун барчангизга раҳмат. Мен ҳозирги кунда "Сурхон" футбол клубида ёшлар жамоаси мураббийлар штабида ишлаб келяпман.

- "Нефтчи" сафида ўйнаб юрган кезларингизда жамоадаги асосий рақобатдошларингиз ким бўлган деб ҳисоблайсиз?

- "Нефтчи"да ўйнаб юрган вақтларимда рақобатдошларим Муҳсин Низомиддинов ва Тимур Хамидов бўлган.

- Жамоанинг ўша вақтдаги бош мураббийи Юрий Саркисяндан бошқалардан кўра ҳам кўпроқ дакки эшитганингиз ростми? Унинг ўзидан бу ҳақда сўраганимизда, кўп ҳаракат қилган футболчи вазиятларда кўзга ташланиши кўпроқ бўлади деб айтганди...

- Мен ўзимни тезкор ҳимоячи бўлганман деб айта олмайман. Футболчи майдонда ҳаракат қилиши, курашиши лозим. Хато қилган бўлсак, шунда мураббий танбеҳ берган бўлса, бунинг ёмон жойи йўқ.

- Ҳаводаги курашларда қайси ҳужумчи сизга қийинчилик туғдирган?

- Ўйин вақтида рақиб ҳужумчиларига гол уришга имкон қолдирмаслик учун боримизни бериб ҳаракат қилардик. Ҳаводаги курашларда менга "Насаф"да ўйнаган ҳужумчи Зафар Холмуродов қийинчилик туғдирарди. У ҳаводаги курашларда боши билан жуда яхши ўйнар эди.

- "Нефтчи" жамоасига сизни акангиз таклиф қилганми?

- Йўқ, жамоага акам таклиф қилмаган. Юрий Саркисянга Хабаев деган мураббий мени тавсия қилган ва таклиф этган. У мени аввалдан яхши биларди.

- Сиз футбол ўйнаган вақтларингизда ўзбек футболидаги энг кучли ҳужумчилар ким эди?

- Мен ўйнаган даврда кучли ҳужумчилар кўп эди. Масалан, Игорь Шквриринга қарши ҳам ўйнаганман. Шуҳрат Мирхолдиршаев, Зафар Холмуродов, Жаъфар Ирисметов, Александр Гейнрих – ўша даврнинг энг кучли ҳужумчилари. Кейин ўзимизнинг жамоада Анвар Бердиев ва Умид Исоқов бор эди.

- Футболдаги биринчи мураббийингиз ким бўлган?

- Биринчи мураббийим раҳматли Отахонов Адҳам ака бўлганлар. У кишидан футболдаги дастлабки билимларни ўзлаштирганмиз. Кейинчалик Юрий Вазгенович ҳам футболнинг қатор сир-асрорларини ўргатганлар. Шулар ҳозирги кунга келиб ўз мураббийлик фаолиятимда асқатяпти.

- Биринчи урган голингизни хотирай оласизми?

- Ҳа, албатта кечагидек ёдимда. "Нефтчи" сафида "Дўстлик" билан ўйинда бош билан гол ургандим. Уй стадионимиз таъмирланаётгани туфайли ўшанда Тошлоқ туманидаги стадионда ўйнагандик.

- "Пахтакор"га қарши ўйинлар ҳар доим бошқача руҳда ўтарди. Футболчиларга айнан мана шу жамоага қарши ўйинда икки ҳисса куч билан ўйнашга алоҳида топшириқ берилармиди?

- Ўша вақтда чемпионлик учун курашадиган асосий даъвогарлар "Нефтчи" ва "Пахтакор" жамоалари эди. Бу жамоага қарши алоҳида иштиёқ билан тайёргарлик кўрардик. Бежиз икки жамоа ўртасидаги ўйинлар "ўзбек класикоси" деб ном олмаган.

- Сочингизни олдириб футбол ўйнашингиз бразилиялик машҳур футболчи Роберто Карлосга тақлидмиди?

- Йўқ, бу ўзим истаган имиж эди. Бир мавсум шу ҳолатда ўйнаганман. Ўшанда ҳам журналистлар шу саволни беришган. Роберто Карлосга ўхшаб ўйнасам, нега Европада ўйнамаяпман деб жавоб берардим.

- "Нефтчи" мухлисларига тилакларингиз...

- Жамоа мухлисларидан жуда кўп яхшилик кўрганман. Ҳали-хамон менга телефон қилиб туришади. "Нефтчи"га ҳамиша омад ёр бўлишини тилайман. Фикримча, Ўзбекистондаги энг кучли мухлислик водийда.

Бекзод Толибов ёзиб олди