Ҳамиджон Актамов кетма-кет иккинчи марта "Қизилқум" ўйинида кўриниш бермаяпти

Эътиборлиси ушбу баҳс қайдномасига иккала жамоанинг ҳам бош мураббийи ёзилмаган. "Машъал"да мавсум бошидан буён Дилявер Ваниев катта мураббий сифатида қайд этилмоқда, расмий бош мураббий Зоир Тўрақулов умуман қайдномага киритилмаяпти.

"Қизилқум"да дастлабки икки турда қайдномада бош мураббий Ҳамиджон Актамов номи ёзилганди. Аммо 2-турдан ўрин олган "Қизилқум" - "Сурхон" учрашуви вақтида Актамов Тошкентда эди. Ўша ўйиндан кейинги матбуот анжуманида катта мураббий Обид Худоёров иштирок этганди. Бугунги ўйинда Актамов ҳам, Худоёров ҳам қайдномадан жой олишмаган. "Қизилқум" U-21 жамоаси бош мураббийи Акмал Холиқов мураббий сифатида ёзилган. 

Эслатиб ўтамиз, 2-турдан олдин собиқ ҳакам Ҳасан Рўзиев "Қизилқум" президенти этиб тайинланган эди. 2018 йил август ойида Ҳамиджон Актамов "Металлург"га қарши Бекободдаги ўйиндан кейин Рўзиевни кескин танқид қилиб "Бугун Ҳасан Рўзиевнинг ўйини бўлди" деб айтган эди. Кейинроқ Ҳасан Рўзиев интервью бериб Актамовдан узр сўраган эди.

Агар ўйиндан кейинги матбуот анжуманига Тўрақулов ва Актамов келмаса ПФЛ регламент бўйича иккала мураббийга ҳам жарима қўллаши шарт. Чунки 1-турда "Сўғдиёна" устози Улуғбек Бақоев матбуот анжуманига кирмагани учун жаримага тортилганди.