Суперлиганинг энг кучли дарвозабони ким?
12 ноя 2022 15:15
Янгиликлар

Суперлиганинг энг кучли дарвозабони ким?

Бу саволга жавоб топиш жуда мушкул.

Жамоаларнинг кучи турлича бўлгани учун ўтказилган голлар нисбати ҳам, қуруқ ўйинлар сони ҳам посбоннинг асл даражасини кўрсатмайди. Масалан, 25-турдан кейинги рақамларга қарасак, "Навбаҳор" дарвозасига мавсум давомида 40 марта хавфли зарба борган. "Динамо" постига эса 109та шундай зарба йўлланган. Табиийки, бундай шароитда самарқандлик киперлар кўпроқ гол ўтказади.

Объектив хулосага эришиш учун дарвоза томон берилган аниқ зарбаларнинг нечтаси бартараф қилинганига қараш керак. Масалан, Ботирали Эргашевни олайлик. АГМК посбони 19 ўйинда ўзи томон йўлланган 45 зарбанинг 34тасини қайтаришга эришди. Яъни, 75,5% вазиятларда жамоасининг жонига оро кирган. Бу ҳозирча Суперлигадаги энг яхши кўрсаткич бўлиб турибди.

Бу йил майдонга чиққанлардан фақат Рустам Нортожиев ("Локомотив", 45 дақиқа ўйнади) билан Азамат Аҳмедов ("Сурхон", 90 дақиқа ўйнади) ҳисобида бирорта ҳам сейв йўқ.

Энди эса чемпионатда 15+ ўйин ўтказган дарвозабонларнинг рейтинги билан танишамиз (Ушбу рўйхат "СпортСТАТ" маълумотлари асосида шакллантирилган).

футболчи	ўйинлар	зарбалар	қайтарилган
Ботирали Эргашев (АГМК)	19	45	75,5%
Абдувоҳид Неъматов ("Насаф")	16	27	74%
Санжар Қувватов ("Пахтакор")	17	45	71,1%
Ўткир Юсупов ("Навбаҳор")	25	40	65%
Акбар Тўраев ("Нефтчи")	16	35	60%
Суҳроб Султонов ("Бунёдкор")	19	57	58,9%
Милое Пракович ("Динамо")	15	60	56,6%
Милан Митрович ("Сўғдиёна")	24	62	54,8%
Игнатий Нестеров ("Қизилқум")	20	54	53,7%
Музаффар Абдуллаев ("Қўқон-1912")	19	46	52,1%
Абдумавлон Абдужалилов ("Локо")	25	64	48,4%
Александр Лобанов ("Металлург")	18	30	40%