Палимпсест

Умуман олганда, нафақат Бекобод, балки бошқа кўпгина клублар тарихи билан боғлиқ интернетдаги маълумотлар учун бир Instagram рельсига тенг вақт сарфлаш етарли. Мозий хусусида қўшимча факт қидириш орқали эса мутлақо бошқа янгиликларга кўз тушиб қолади, шунда хотира бойлигинингиз учун беихтиёр Архимеднинг қичқириғини такрорлашингиз мумкин.

Сарлавҳа ҳам сиз учун янги кўчиб келган қўшнингизнинг қовоғи солинган кучуги каби нотаниш ва ғалати кўринган бўлиши мумкин. Тарихни титкилаш ортидан даққиюнусдан қолган википедия орқали шу сўз қаршимдан чиқиб қолди.

Бу сўзнинг дахли йўқ деса ҳам бўлади. Қадимда теридан тайёрланган қоғоз ниҳоятда қимматбаҳо бўлгани сабабли, унинг юзасидан эски матн ўчирилиб, устига янги матн ёзилиши шундай атама келиб чиқишига сабаб бўлган.

Бу билан "Металлург" тарихига ўчирғич бош қўйган деган фикрдан йироқман. Аксинча, унинг асоси "рестарт" қилиниб, янги тарих битишга шайланмоқда.

Атамадан яна бир маъно топдим ўзимча. Боболаримиз борса-келмасга сафарбар қилинган қирғин якунланган йил ташкил топган ва 1994 йилдан бери "Металлург" дея атала бошлаган клуб мазкур ном остида фаолият юритаётган биринчи жамоа эмас экан. Бу тарихий жамоа узоқда эмас, қўшни Олмалиқда тузилган. 

Ўтган асрнинг 60-йилларида ташкил топган Олмалиқнинг "Металлург"и СССРнинг иккинчи лигасида ўша вақтда "Цементчи" деб аталган бекободликларнинг ашаддий минтақавий рақиби ҳисобланган. "Металлург" ҳақидаги охирги маълумотни 2009 йилги Ўзбекистон Иккинчи лигасидаги иштирокидан топдим. Ундан кейин клуб ёпилган бўлса керак.

Демак, биринчи "Металлург" Бекободда эмас, Олмалиқда ташкил топган экан. Эҳтимол, кўпчилик бу фактни карра жадвали каби ёддан билган. Маълумот ўрнида айтдим-қўйдим.

"Қурувчи" номи билан ташкил этилган ҳозирги "Бунёдкор"нинг ҳам бобономидан авваллари кўпгина жамоалар фойдаланишган. Баъзилари русча "Строитель"дан фойдаланган (ўтган асрнинг 70-йилларида "Динамо", Зарафшондаги футзал жамоаси), айримлари "Бинокор" ("Бухоро", МҲСК), шунингдек, "Қурувчи" номининг ўзидан "Хоразм" 1991–1992 йилларда фойдаланган.

Хуллас, охирги марта 36 йил муқаддам кубок соҳиби бўлган (ҳаваскор жамоалар ўртасидаги Ўзбекистон ССР кубоги) бекободликларнинг палимпсестига ўчмас битиклар ёзилишига тилакдошман.

"Металлург" ўз номини доимгидек деворга илинган жадвалнинг ўрталиғидан эмас, бўйнимизни оғритиб, юқорироқдан қидиришга мажбур қилади, деган умиддаман. 

Оқил Абдубарноев