Славче Войнески: "Биз иккинчи бўлимда бирлашиб, керакли натижага эришдик"

- Ўйин ҳақида фикрларингиз

- Биз учун қийин ўйин бўлди. Ҳаво ҳарорати жуда юқори эди. Бу айниқса биринчи бўлимда сезилди. Шу билан бирга? таркибдаги аксарият футболчилар терма жамоалардан келиб қўшилишган эди. Бу ўйинга тайёрланиш учун 2-3 кун вақт бўлди. Бунинг таъсирида биринчи бўлимда яхши ўйин кўрсата олмадик. Биз иккинчи бўлимда бирлашиб, керакли натижага эришдик. Нима хоҳлашимизни жуда яхши биламиз. Иккита гол киритдик. Мезбонларга ҳам раҳмат айтмоқчиман. Улар бизга деярли бўш ҳудудлар қолдиришмади.

- Суюнов ва Хаджиевда дисквалификация бор эди. Оливер Шаркич ва Алижоновларнинг қайдномада йўқлигига сабаб нима эди?

- Бу биз учун йўқотиш эди. Улар асосий таркиб ўйинчилари. Шаркичда жароҳат бор эди. Оливер бу жароҳатни "Олимпик"ка қарши ўйинда орттириб олганди. Умид қиламанки, Шаркич биринчи давранинг сўнгги ўйинига қадар сафга қайтади. Аммо биз ҳали ҳам докторлар хулосасини кутмоқдамиз. Алижоновда ҳам жароҳат бор. У терма жамоадаги охирги ўйиндан олдин жароҳат олди. Алижоновнинг тикланиш жараёни яхши кетмоқда. 

- "Қизилқум" ҳақида нима дея оласиз?

- "Қизилқум" жуда яхши жамоа экан. Улар майдонда нима қилиш кераклигини яхши билишади. Биринчи таймда ажойиб прессинг амалга оширишди. Буни уларнинг мураббийига ҳам айтдим. Иккинчи бўлимда эса уларда жисмоний ҳолат бўйича камчиликлар борлиги билиниб қолди. Биринчи бўлим иккинчисидан катта фарқ қилди.