Ишониш қийин, аммо улар бир жамоада тўп тепишган...

Ян Облак ва Эдерсон

Айни пайтда дунёнинг топ-дарвозабонларидан бўлган бу икки футболчи 2012/13 йилги мавсумда Португалиянинг ўртамиёна жамоаси "Риу-Аве" клубида бирга фаолият олиб борган. Словениялик дарвозабон ўша мавсумда асосий кипер сифатида танланди ва 31 ўйин ўтказди. Бир мавсумдан кейин у "Бенфика"га қайтди ва Эдерсон унинг ўрнини эгаллади. Бир неча йиллардан кейин улар энг топ-даражада ўйин кўрсатиб, кучли жамоалар таркибига қўшилишди.

Дэвид Бекхэм ва Дэвид Мойес

1994/95 йилда "Престон" клуби ёш юлдуз Дэвид Бекхэмни ижара асосида таркибга қўшиб олди ва бу клубда юқори формадаги Дэвид Мойес ҳам фаолият олиб борарди. Бекхэм жамоада атиги 5 та ўйинда майдонга тушган ва 1 та голни ўз ҳисобига ёзиб қўйган. Бекхэм интервьюларидан бирида бир йиллик ижара муддати давомида Мойесдан кўп нарса ўрганганини ва буни ҳеч қачон унутмаслигини айтиб ўтган эди.

Ривалдо ва Каземиро

2011 йилда Ривалдо фаолиятидаги катта саёҳатдан сўнг "Сан-Паулу" клубига қайтди. Афсона ҳақиқатан ҳам катта ҳурмат ва эътибор билан кутиб олинди ҳамда унга бутунлай эркинлик тақдим этилди. 30 ўйинда 5 та гол уришга муваффақ бўлди.  Айни шу пайтда профессионал фаолиятидаги иккинчи мавсумини ўтказаётган Каземиро ҳам жамоанинг асосий ўйинчиларидан эди. Бир йилдан сўнг у "қироллик клуби" эътиборига тушди ва клуб билан хайрлашди.

Эдгар Давидс ва Уильфрид Заха

Давидс 2010 йилда "Кристал Пэлас" билан қисқа муддатли шартнома имзолади. Ярим ҳимоячи "Пэлас" учун атиги 6 ўйинда иштирок этди. Уильфрид ҳам шу мавсумда ўзининг катта фаолиятидаги илк қадамини қўйганди. Биринчи мавсумидаёқ у барча турнирларда 44 ўйин ўтказди. Давидс эса ўша мавсумдан кейин клуб билан шартномасини бекор қилган.

Маурисио Почеттино ва Роналдиньо

"Эспаньол"даги ёрқин ўйинларидан кейин ПСЖ аргентиналик футболчини жамоага олиб келади. Почеттино пойтахт жамоасида икки мавсум (2001/2003 йиллар оралиғи) ўтказиб, 95 ўйинда майдонга тушди. Бразилиялик афсунгар ҳам айни шу мавсумлар давомида Париж клуби сафида ҳаракат қилган. Почеттино ва Роналдиньо биргаликда яхши натижалар қайд этган. Кейинроқ "Барселона" юқори даражада ўйин намойиш қилган Роналдиньони таркибга жалб қилган.

Патрик Клюйверт, Эден Азар ва Пьер-Эмерик Обамеянг

Афсонавий Патрик Клюйверт 2007/08 йилги мавсумда "Лилль" клубида Эден Азар билан жамоадош бўлган. 31 ёшли нидерландиялик футболчи Лига 1 да 9 ўйин ўтказди. Шу мавсум Клюверт учун сўнггиси эди. Азар эса клубда яна 4 йил тўп тепди. 2009/10 йилги мавсумда жамоага "Милан"дан ижара асосида Пьер-Эмерик Обемеянг ҳам қўшилди. Габонлик футболчи клубда 24 ўйин ўтказди.

Марадона ва Диего Симеоне

"Севилья" клуби 1992/93 йилги мавсумда Марадонани клубга таклиф қилган. Буни қарангки, афсонанинг футболчилик фаолиятидаги сўнгги мавсумлари Симеоненинг илк мавсумларига тўғри келади. "Атлетико" устози интерьюлардан бирида кийиниш хонасида афсонани кўриб, ҳаяжондан ўзини йўқотиб қўйганини айтиб берган. 

Шуҳрат Ҳомидов тайёрлади