"Агар пулни ўйлаганимда "Локомотив"ни эмас, араб клублардан бирини танлардим" Жасур Жалолиддинов билан интервью (матнли)

- Ўтган давр мобайнида сиз ва жамоангиз "Локомотив" ҳақида кўплаб маълумотлар, мақолалар чиқди. Мана шу миш-мишларга ойдинлик киритиш мақсадида сизни интервьюга таклиф қилдик. Келинг, дастлаб "Локомотив"га ўтиш тарихини гапириб берсангиз...
- Ўтган мавсум янги йил байрами атрофида агентлар қўнғироқ қилиб "Локомотив" қизиқиш билдираётганини айтишган. Агар ўтишни истасанг биз шу даражагача олиб келамиз деб таъкидлашганди. Мен эса уларга жавобан бу жамоа ёқишини билдирганман. Шундан сўнг трансфер амалга ошишига 2-3 ой қолганида бошқа таклифлар кўриб чиқилмаган. Фақат "Локомотив" ҳақида ўйлашни бошладим. Қолган ишларда тўғриси мен қатнашмадим. Агентлар билан гаплашганимда ҳам ҳар доим вазият "Бунёдкор" фойдасига ҳал бўлишини илтимос қиламан. Уларнинг айтиши бўйича бу ерда ҳеч қандай тушунарсиз иш бўлмаган. Мақсадим "Бунёдкор"дан яхши жамоага ўтиш, бундан ортиқ ёмон ниятим, ғараз мақсадим йўқ эди. Агар ниятим бошқа бўлганида менда бунинг учун имконият юзага келган. Вадим Абрамов жамоага келган илк пайтида Россиянинг бир жамоасининг академиясига йўл олишим мумкин эди. Истаганимда, клубни шу аҳволга ташлаб кетгим келгани ўшандаёқ бу ишни амалга оширардим. Мен ҳар доим жамоадан чиройли кетишни хоҳлаганман.

- "Локомотив"даги илк ҳафта қандай ўтди? Таассуротлар билан ўртоқлашсангиз, кумирларингиз билан бирга машғулот ўтказишни завқини ҳис қилдингизми?
- Кетишим ҳам муаммоли бўлди. Жамоамизда коронавирус чиқди. Кета олмасам керак деган ҳаёлга ҳам бордим. Мени хотиржам қилган нарса мураббийнинг хонасига чақириб: Ҳеч қандай гапларга эътибор қилма, менинг скаутларим бор, улар бутун дунёдан иқтидорларни қидиришади. Сени мен чақирганман. Унинг шу гапидан кейин менда стресс ёки ҳаяжон бўлмади, кимларнидир гапларига эътибор қилмадим. Мана шу жараёндан сўнг ўзимда ҳеч қандай ўзгариш сезмадим.

- Гап-сўзларга қараганда сизни аввалги раҳбарият ва мураббий чақирган. Лекин янги мураббий Николич менга керак эмас деган гапларни айтган экан.
- Николичнинг бир гапи бор эди." Ёш футболчи дегани бирданига ўйнаб кетмайди",- деган. Тажрибали футболчиларни олдида тажриба тўплаб боришимизни, вақти келиб майдонга тушишимизни кўп бор таъкидларди. Сиз айтган фикрларни тўғриси ўзим аниқ фактлар билан эшитмаганман.

- Сизни чемпионат баҳсларига рўйхатдан ўтказишни кечикканлигини қандай қабул қилгансиз? Ўша паллада якка тартибда машғулот ўтказаётган эдингиз...
- Расмий ўйинлардан олдин рўйхатдан ўтмаганлар алоҳида машғулот олиб борарди. Бошқа пайт эса жамоа билан бирга бўларди. Бир куни мураббий мени олдига чақириб нима учун муаммоларни ҳал қилмаётганимни, менга умид қилаётганини ва майдонга туширишини айтди. Ўша учрашувдан сўнг ҳал қилганман, "Ростов","Зенит" каби ўйинларда захирада ўтиргандим. Қалтис вазият юзага келган, ҳисоб 0-0 кўринишини олганди. Агарда натижа бошқача бўлганида мураббий имконият берарди. "Локомотив"га ўтишимга ҳамма ҳар хил қаради. Кўпчилик пул учун кетди, агентлар пулни танлади дейишди. Очиқ ойдин нима бўлганини билмайман. Агар пулни деганимда араб давлатларидан тайёр таклифлар бор эди. Кўзимни юмиб шу чемпионатлардан бирига борардим. Мен Чемпионлар лигасида ўйнайдиган жамоага бордим.

- Рўйхатдан чиқаришганида нималарни ҳис қилдингиз?
- Аввалига рўйхатга қўшишганида ичимда ишонч пайдо бўлди. Жамоага яхши киришиб кетдим. Қайсидир маънода умид бор эди. Лекин ҳамма нарсага тайёр турдим. Рўйхатдан чиқаришганини тўғри тушундим. Чунки, улар яхши савиядаги футболчисини кучли жамоага сотди. Мен Ўзбекистондан бордим. Чемпионлар лигасида ўйнайдиган жамоа Ўзбекистондан футболчи олиб бирданига ўйнатмаса керак деб ўйладим. Ҳали уларнинг талабига жавоб бермайман.

- Ўша пайтдаги жисмоний ҳолатингиз бўйича жамоадаги футболчиларга рақобат туғдиришга тайёрмидингиз?
- Буни яшириш шарт эмас. Мен тайёрмасдим. У ерга кетишимдан олдин ҳам буни билардим. Ўзбекистондан бориб "Локомотив" футболчилари билан тенглашиш нотўғри бўларди. Айримлар Испанияга бор, сенинг услубинга мос деди. Лекин, Испанияга боришим учун ҳам жисмоний ҳолатимни яхшилашим керак эди. Гарчи москваликлар сафида майдонга тушмаган бўлсамда, мураббий билан алоҳида ишлаб жисмоний томондан камчиликларимни тўғирлай олдим. 2-3 ой ичида катта футболчилар орасида ўзимни яхши ҳис қилишни бошладим.

- "Локомотив" ЕЧЛда яхши ўйин кўрсатди. Керак бўлса, "Атлетико" билан ҳам дуранг натижа қайд этди. Аммо, ички чемпионатда муносиб иштирок эта олмаяпти. Ҳозирда турнир жадвалида саккизинчи ўринда кетмоқда. Бунга сабаб сифатида нимани кўрсатиш мумкин?
- Жамоада ички муҳит яхши даражада. Шароит томонидан муаммо йўқ. Ҳаммаси зўр. Кўпчилик бу жамоани ЕЧЛда муаммо тўғдира олади деб ўйлайди. Менимча, орада мураббий ва клуб президенти билан озгина тушунмовчилик бўлди.

- "Тамбов"га ўтишингиз кимнинг танлови бўлди?
- Жамоада легионерлар учун битта бўш жой бор, кутиб турамиз дейишди. Кўп легионерлар бошқа жамоаларга кетишди. Мен қолиб жамоа билан машғулотлар олиб бордим. 2-3 қолганда мени ижарага беришлари аниқ бўлди. Агарда бир ой олдин айтишганида яхшироқ жамоага ўтардим. Трансфер ойнаси вақтида ҳамма жамоалар таркибини тўлдириб оларди, кимда бўш жой бўлса ўша клубга ўтишдан бошқа иложим қолмаганди. Ҳаттоки, "Бунёдкор"га ҳам қайта олмасдим.

- "Тамбов"да вазият қандай бўлди? Мураббий сизга фақат кубок баҳсида битта ўйинда имконият берди...
- Ўйлашимча, мураббий кўпроқ тажрибали футболчиларга ишонди.

- Агентингиз билан танишиш тарихини айта оласизми?
- Мени анча пайтдан бери кузатиб юрарди. Биринчи маротаба Дубайдаги йиғин давомида кўришиб танишганмиз.

- Олти ойдан бери ўйин амалиётига эга бўлаётганингиз йўқ. Ёш футболчига бу қанчалик таъсир қилади деб ўйлайсиз?
- Футболчи ўйнамаса ўсмайди деган фикрга қўшилмаган бўлардим. Машғулотлардан ҳам кўп нарса ўрганса бўлади. Ака-ука Миранчук, Чорлука каби футболчилар билан бирга машғулот ўтказиб завқланардим. Кўп нарса ўрганишга ҳаракат қилардим, керак бўлса уларнинг ортидан машқларни қайтарардим. Маслаҳат олардим.

- Барибир четга чиққан футболчида ўзимизнинг чемпионатни, футболчиларни таққослаш имкони юзага келади...
- Биринчи ўринда шароит. У ерда проффессионал футболчи бўлиш учун барча нарса бор. Клубдаги витаминизация, шароитдан келиб чиқиб футболчи ўз-ўзидан проффессионал даражага чиқади.

- Мухлислардан ҳам саволлар келган. "Локо"ўтиш хато эмасмиди? Ҳар ҳолда Миранчук билан рақобатлашишингизни билардингиз...
- Ўтган иш ўтиб кетди. Мен ҳеч нарсадан афсусланмайман. Футболчининг йўли бўлса, мен битта йўлдан кетдим. Барчаси ўз қўлимда, деб ўйлайман.

- "Спартак" футболчиси Остон Ўруновнинг ЦУМдаги сурати ижтимоий тармоқларда муҳокамаларга сабаб бўлди. Ушбу ҳолатга муносабатингиз ни билдирсангиз...
- Остон Ўруновнинг суратини нотўғри қабул қилмадим. У ўзи ишлаб топган пулга кийинди. Жамоасидаги бошқа легионерлар ҳам шундай суратларни инстаграм саҳифасига жойлаган. Бироқ, нима учундир фақат уни муҳокама қилишди. Мен ҳам ҳавас қилиб кийингим келган. Аммо, шундай ҳолат бўлишини билиб расм қўймадим.

- Барибир "Локомотив"да катта маош оласиз. Совғалар олиб келганингизда уйдагилар қандай кутиб олишди?
- Тўғриси, улар мендан совға ёки бошқа нарсалар кутишмайди. Биринчи ўринда соғ-саломат юрсам бўлгани. Бувим, тоғам ҳам ҳеч нарса керак эмас деб айтишади. Лекин, мақсадим мени болалигимдан ҳеч нарсага зориқтирмасдан, кам қилмасдан катта қилган уйдагиларимга имконим борича ёрдам бериш. Қолган нарса ҳақида кўп ўйламайман.

- Гарчи оғриқли бўлсада бу саволни беришга мажбурман. Ҳозирги ютуқларингизни ота-онангиз кўрмаганидан афсусланмайсизми?
- Ҳаммаси худодан. Авваллари шундай хаёл ўтарди. Агар ота-онам ҳаёт бўлганида ва бундай қийинчиликларни кўрмаганимда балки бу даражадаги футболчи бўлиб етишмаслигим мумкин эди. Улар мени кузатиб туришганини биламан. Ҳаётда ягона мақсадим уларнинг орзуларини рўёбга чиқариш.

- "Беневенто"га ўтмаганингизни сабаби нимада?
- Италия клубига ўтмаганим кўп муҳокамаларга сабаб бўлди. Пандемия бошлангач "Беневенто"га бормаслигим аниқ эди. Хабарларда ҳам у ерга фақат кўрик учун боришим қайд этиб ўтилганди. Кўрикда барибир эътибор кучли бўлмайди.

- Ўзингиз ҳақингизда матбуотда чоп этилаётган мақолаларни кузатиб борасизми?
- Инсонларнинг фикрларини ўқиб, ҳаволаниб кетиб ўсмай қолган футболчилар етарлича. Мухлисларга шунчалик қайғуришгани учун раҳмат айтаман.

- Суҳбатимизни терма жамоа ҳақида давом эттирсак. Сизнинг ёшингиздаги авлод ўсмирлар ва ёшлар ўртасидаги Осиё чемпионатларида иштирок эта олмади. Қандай ҳиссиётлар кечди?
- Илк маротаба Дилшод ака Нуралиев мураббийлигида саралашда иштирок этганмиз. Биздан аввалги ўсмирлар терма жамоаларининг барчаси Осиё чемпионатларида қатнашган. Саралашдан қолиб кетишимиз мумкин эмасди. Мусобақада қийин вазиятга тушиб қолдик, самалётга улгурмасдан бир кун автобусда юрдик. Сўнгги ҳал қилувчи ўйинда Саудия Арабистонига ютқазганмиз. Ўшанда менинг ҳам катта хатоим бўлган. Яқин орада Дилшод акани ўзларига ҳам айтиб узур сўрадим. Иордания билан ютадиган ўйинимизда юз фоизлик вазиятлардан фойдалана олмаганман. Сўз билан ифодалаш қийин. Ўшанда кўп болалар футболни йиғиштиришганди. Бизда яна бир имконият бўлди. Энди ёшлар терма жамоаси билан саралашга бордик. Хатоларимизни такрорламасликка ҳаракат қилдик. Гарчи Осиё чемпионати мезбонлиги бизга берилган бўлсада, гуруҳимиздаги Саудия Арабистонидан реванш олиб уларни ортда қолдиришни истагандик. Ўша лаҳзаларда йигитларнинг кўзида ўт ёнарди. Биринчи бўлимда футболчимизга қизил карточка кўрсатишган ва дарвозамизга пенальти белгилашган. Танаффусда ҳамма йиғлаганди. Катта жанжал ҳам бўлган. Иккинчи бўлимда ҳисобни тенглаштирганмиз. Бу лаҳзаларни ҳеч нарсага алмашиб бўлмайди. Мусобақадан сўнг Отабек ака ишдан олиндилар. Темур ака ҳам яхши жамоа шакллантирдилар. Насиб қилмаган экан эндиликда олимпиядага чиқишга ҳаракат қиламиз.

- Футболдаги армонингиз ва орзуингиз борми?
- Армон ҳақида ўйламайман. Битта-ю битта орзуим вафот этган онамнинг орзуларини амалга ошириш.