JCH-2014. PREVYU. Franciya – Gonduras

Evropaning kuchli jamoalaridan biri Franciya guruh autsayderi Gondurasga qarshi bahs olib boradi. O'yin Portu-Alegri shahridagi “Beyra-Rio” stadionida bo'lib o'tadi.

JCH-2014. “E” guruhi. 1-tur
FRANCIYA – GONDURAS
Bosh hakam: Sandro Richchi (Braziliya)

Taxminiy tarkiblar
Franciya: Loris - Sanya, Koselni, Saxo, Evra - Pogba, Kabay, Matuidi - Valbuena, Jiru, Benzema.
Gonduras: Valyadares - Bekeles, Bernardes, Figeroa, Isagirre - CHaves, Palasios, Garrido, Espinosa - Bengston, Kostli.



Franciya terma jamoasining avvalgi jahon chempionatidagi ishtiroki ancha g'alvali yakun topdi. Bosh murabbiy Raymon Domenek jamoa tizginini butkul qo'ldan chiqarib yubordi. Natijada ayrim futbolchilar o'zlariga erk berib yuborishdi. Bu esa o'yinga o'z tasirini ko'rsatmay qolmadi. Franciya uch o'yinda atigi bitta gol urgan holda musobaqani tark etdi.

Evro-2012da Loran Blan boshqaruvidagi jamoa oz bo'lsa-da o'z o'yinini topib oldi. Franciya chorak finalda bo'lajak chempionlar Ispaniyaga mag'lub bo'ldi. Navbatdagi jahon chempionatiga esa terma jamoani yangi murabbiy tayyorladi. Franciya JCHga chiqish uchun pley-offdan arang o'tdi, Dide Desham bir amallab ijobiy natija qayd eta oldi.



Franciya bu mundialda nimani qoyillata oladi? Agar jamoa saralashning pley-off bosqichida Ukraina bilan bo'lgan birinchi o'yinini namoyish etsa, unda guruhda qolib ketadi. Mabodo ikkinchi o'yinini ko'rsatsa, unda uzoqqa borishi mumkin. Franciya uchun bugungi raqib Gonduras oddiy ko'rinishi mumkindir, lekin SHveycariya va Ekvador bilan ularga oson bo'lmaydi. SHu o'rinda Gondurasni ham juda kuchsiz deyish xato. Axir jamoa mundial arafasida Angliya bilan o'rtoqlik uchrashuvi o'tkazib, 0:0 hisobini qayd etdi. Umuman olganda, Gonduras o'zining oxirgi ettita o'yinidan atigi bittasida g'alaba qozondi.



Francuzlarda esa oxirgi natijalar har qalay yomon emas. Kievdagi 0:2 hisobidagi mag'lubiyatdan so'ng ular keyingi beshta uchrashuvda 18ta gol urishdi (Yamaykaga 8ta, Norvegiyaga 4ta, Ukrainaga 3ta, Gollandiyaga 2ta va Paragvayga bitta) va atigi bitta to'p o'tkazib yuborishdi. Franciya uchun eng katta yo'qotish bu Frank Riberining jahon chempionatida qatnasha olmasligi hisoblanadi. SHunga qaramay, “Uch ranglilar”da boshqa yarim himoyachilar etarlicha topiladi.



Dide Desham (Franciya termasi bosh murabbiyi): “Gonduras oxirgi ikki yilda ancha yaxshi shakllandi. Ular 4-4-2 sxemasini tanlashdi. Men bu jamoaning Angliya bilan o'yinini ko'rdim, raqib yaxshi taassurot qoldirdi. Gonduras tajovuzkor futbol namoyish etishni xush ko'radi”.



Luis Fernando Suares (Gonduras termasi bosh murabbiyi): “Jamoamiz oldiga qo'yilgan maqsad - keyingi bosqichga chiqish. Bu guruhda har bir jamoada imkoniyat bo'ladi”.

Qiziqarli faktlar
Jamoalar hali o'zaro o'ynashmagan.

Gonduras o'z tarixida uchinchi marta jahon chempionatida ishtirok etyapti.




X.Xoliqov tayyorladi.