Vadim Abramov: "Juda yomon o'yin namoyish etdik. Muxlislardan uzr so'rayman"

"O'yin xuddi ob-havo kabi bo'ldi. Muxlislarimizdan uzr so'rayman. Ular shunday ob-havoda bizni qo'llab-quvvatlashdi. Biz esa juda yomon o'yin namoyish etdik. Raqibga etarlicha tayyorgarlik ko'ra oldik. "Buxoro"ni bir ochko bilan tabriklayman. Futbolchilarga esa etirozlarim bor", - dedi Vadim Abramov bugungi bahs haqida.

- "Dinamo" joriy mavsumda kam gol o'tkazib yuborayotgan edi, ammo bugun jamoa o'z darvozasidan ikkita to'p olib chiqdi. Himoya chizig'ining o'yiniga qanday baho berasiz?

- O'yin shunday tus oldi. Biz juda noto'g'ri o'ynadik. Tanaffusda raqib hujum qilmayotgani va pressing ham qilmayotganini aytgan edim. Raqib esa faqatgina bitta xato to'p uzatishni kutayotgan edi va qarshi hujumlar orqali vaziyatlarga ega bo'lmoqchi edi. "Buxoro" standart vaziyatlarga tayanishini ham bilar edik. Shunday ham bo'ldi. Biz ikkita golimizni ham standart vaziyatdan o'tkazib yubordik. Butun jamoa noto'g'ri o'ynadi. Ustiga-ustak bunday kutilmagan ob-havo.

- Futbolchilar bugun raqibga etarlicha baho berishmadi dedingiz. Bunga sabab "Buxoro"ning mag'lubiyatli seriyasimidi?

- Albatta. Raqib jamoa bundan avvalgi o'yinda 0:6 hisobida mag'lub bo'lganidan so'ng shunday fikrlar uyg'onishi aniq. Men o'yinni stadiondan kuzatgan edim va hisob maydondagi o'yinga mos emas edi. Shu fikrlarni futbolchilarga etkazishga harakat qildim. Oson bo'lmasligini aytdim. Mening ko'rsatmalarim etarli bo'lmagan ekan. Afsuski, o'yin vaqti bir narsani o'zgartirish juda qiyin. Mag'lub bo'lmaganimizga ham shukr.

- "Buxoro" hisobda oldinga chiqib olganidan so'ng vaqtni cho'za boshladi. Ushbu jihat jamoangizga qanchalik tasir qildi?

- Men ushbu masala bo'yicha hakamlar bilan gaplashdim. Hakamlar ikkinchi bo'limga bor-yo'g'i 6 daqiqa vaqt qo'shib berishdi. Hakamlar menga sekundomer orqali barchasini hisoblashganini aytishdi. Futbolimizda vaqt cho'zish masalasi bo'yicha hakamlar bilan gaplashganman. Agar futbolchi vaqt cho'zsa, unga sariq kartochka ko'rsatilishi kerak. Futbolchi tibbiy yordam uchun maydondan tashqariga chiqsa, uni taxminan besh daqiqa davomida o'yinga qo'shilishga ruxsat berilmasligi kerak. Shunday jazolar orqali ushbu muammolarga qarshi kurashsa bo'ladi deb o'ylayman. Muxlislar futbol ko'rish uchun uzoq yo'lni bosib o'tishadi-ku axir.

- Bugungi uchrashuvga terma jamoamiz bosh murabbiyi Timur Kapadze tashrif buyurgan ekan. Sizga terma jamoa bosh murabbiyi "Dinamo"ning qaysi futbolchilarini kuzatib borayotgani haqida xabar berishdimi?

- Ushbu xabarni sizdan eshityapman.