Terma jamoaning bugungi kunidan xabarlar...

Afsuski, tarkibda yo'qotish mavjud. Suriya bilan o'yinning ikkinchi bo'limida Javohir Sohibovga almashtirilgan Aziz Haydarovning jarohati jiddiy bo'lib chiqdi. SHu sabab u Qatarda bo'lib o'tadigan o'yinda ishtirok eta olmaydi. Bugungi mashg'ulotlarda Vitaliy Denisov ham qatnashmadi. Vitalikning avvalgi jarohati bezovta qilgan ammo uniki Haydarovchalik jiddiy emas.

Suriya bilan bahsda Odil Ahmedov ham og'riq qoldiruvchi ukol yordamida maydonga tushgan edi. Odil so'nggi bir oyni "Krasnodar" safida ham jarohati bilan o'tkazyapti. SHu boisdan Oleg Kononov uning xizmatlaridan 100%da foydalana olmayapti. 

Yuqoridagi uch futbolchimizga sog'liq tilaymiz!

Mashg'ulot soat 17:00ga belgilandi. Boisi, Qatardagi o'yinni QFA soat 19:00ga belgilagan. Bu vaqtda mamlakatdagi havo harorati taxminan 32-35 daraja issiq bo'ladi. Samvel Babayan futbolchilarni o'yin vaqtidagi havoga ko'nikish hosil qilishi uchun mashg'ulot vaqtini ancha ertaroqqa belgiladi. 

Terma jamoamiz futbolchilari avvaliga 10 daqiqa davomida stadion bo'ylab yugurish mashg'ulotini o'tkazdilar. SHundan keyin barcha stadion zalida chigal yozdi mashqlarini bajardilar. Suriya terma jamoasiga qarshi uchrashuvda maydonga chiqqan futbolchilarga javob berilgach, qolgan o'yinchilarimiz to'laqonli mashq o'tkazdilar.

Ertaga MTJ to'liq tarkibda mashq qiladi va 4 sentyabr kuni tongda, charter reysda, Toshkent - Doha yo'nalishi bilan Qatar poytaxtiga uchib ketadilar. U erda vakillarimiz JCH-2018 saralash bahsi doirasida Qatar terma jamoasiga qarshi maydonga tushadilar.

Nodirxo'ja Yuldashev.