2 o'rindiqqa 3 odam

O'sha kuni O'zbekiston kubogi chorak finali doirasida "Paxtakor" - "Mashal" hamda "Bunyodkor" - "Buxoro" uchrashuvlari bo'lib o'tishi kerak. Bundan tashqari, xuddi shu sanaga Proliga 13-turidan o'rin olgan "Olimpik" - "Olimpik MobiUz" bellashuvi belgilangan. Bonusiga aynan 26 avgust kuni "Humo Arena"da futzal bo'yicha O'zbekiston Superkubogi ham bo'lib o'tadi. Bir kunda Toshkentda to'rtta o'yin bo'lib o'tishi kerak. "Paxtakor" o'z o'yinini "Jar" stadionida o'tkazadi, futzal "Humo Arena"da, Proliga o'yini "Do'stlik" stadionida o'tkaziladi. Savol: "Bunyodkor" o'z o'yinini qaerda o'tkazadi? Jenifer opa koncert berib ketganlaridan keyin "Bunyodkor" stadioni chimi tamirga muhtoj (vaholanki hamon chimni o'ziga keltirish uchun harakat boshlanmagan yoki harakat boshlangan harajat qilinmayapti), hech qanaqasiga futbol o'ynab bo'lmaydi. "Qaldirg'ochlar" nima qilishadi? "Do'stlik"da ham ikkita "Olimpik"ni o'zaro bahsi bor. Olmaliqdagi stadion? OKMK rahbariyatiga bu borada savol bilan murojaat qildik. Ular "Bunyodkor" - "Buxoro" o'yinini Olmaliqda o'tkazish haqidagi so'rovga rad javob berishganini aytishdi. Sababi, stadion chimining ahvoli yomonlashgani va asosiysi esa o'sha kuni Olmaliqdagi stadionga yondosh xududlarda Mustaqillik bayrami tadbirlari bo'lib o'tishi kerak ekan.

U holda "Bunyodkor" qaysi stadionda o'ynaydi? O'zi bir kunda Toshkentda bir emas, ikki emas, to'rtta o'yin o'tkazish qanchalik to'g'ri? Shu uchrashuvlarning hammasini yoritishni xohlagan OAV vakillari ulardan faqat bittasini tanlashga majbur bo'lib qoladiku, xodimlar bo'lingan taqdirda ham birdaniga to'rt o'yinga bo'lishga etarli jurnalist, fotograf va mobilograflar bo'lmasligi aniq. Shaxsiy fikrimcha, "Bunyodkor" - "Buxoro" bellashuvi bir kun keyinga ko'chirilishi mumkin. Boshqachasiga hammasi atala bo'lib ketadi. Yoshligimizda uchta o'rindiqqa to'rt kishi, keyingi bosqichida ikkita o'rindiqqa uch kishi musiqa tugaganda kim birinchi o'tirib olishga o'ynaladigan o'yin bo'lardi. 26 avgust kungi o'yindan "Bunyodkor" va "Buxoro" chiqib ketadimi shunda...

26.08.2025

"Paxtakor" - "Mashal", "Jar" stadioni

"Olimpik" - "Olimpik MobiUz", "Do'stlik" stadioni

BMB - "Oil Star", "Humo Arena"

"Bunyodkor" - "Buxoro"???