SQUAWKA.com tahlili: Abduqodir Husanov - "Manchester Siti"ning xatodan boshlagan mustahkam himoya qo'rg'oni

Unda Husanovning Angliyaga kelgan ilk kunlaridan boshlab, hozirgi davrdagi holati haqida so'z borgan. Quyida ushbu maqolani etiboringizga havola etamiz.

"Manchester Siti" muxlislari jamoada Abduqodir Husanovdek himoyachi borligidan xursand bo'lishlari kerak". Tahliliy maqola shu jumla bilan boshlanadi. Yosh himoyachining Angliyadagi hayoti oson boshlanmadi. Yangi mamlakat, yangi shahar, yangi muhit...

Uning debyuti ham oson kechmagandi. "Chelsi"ga qarshi birinchi o'yinda Husanovning xatosi golga olib keldi. Bu o'yinda "Siti" 3:1 hisobida yutganini unuting. Oradan oylar o'tdi. Abduqodir tezda o'ziga kelib oldi va muxlislar ishonchini qozona boshladi. Shunday bo'ldiki, o'sha xatoni hamma unutib yubordi. Lekin "Lans" futbolchisi uchun xatoni esdan chiqarish oson bo'lmaganini ham aytib o'tmasak bo'lmaydi.

Bu o'rinda eng asosiy ishni jamoa bosh murabbiyi Pep Gvardiola bajardi: u yosh futbolchini katta bosimdan olib chiqib keta oldi. 21 yoshli himoyachini ketma-ket oltita o'yinda asosiy tarkibga tushirish orqali Gvardiola Husanovga naqadar ishonishini ko'rsatib qo'ydi. Yangi mamlakatga kelgach, yosh yigitga oson bo'lmasligini murabbiy chuqur anglab turardi, shu bois ustamonlik bilan ish olib bordi. Boz ustiga Husanov ingliz tilida gapirmasdi, bu borada ham murabbiy tutgan yo'l unga qo'l keldi.

Chuqurlikdan chiqish

Vaziyat shunday ediki, Abduqodir Husanov hammadan chetda qolgan, go'yoki unutib qo'yilgan bola edi. Mateus Nunes o'ng qanot himoyachisi sifatida deyarli xatoga yo'l qo'ymas, Ruben Diash, Yoshko Gvardiol va Jon Stouns mustahkam himoya qo'rg'onlari bo'lib, jamoa himoya chizig'ini ularsiz tasavvur qilib bo'lmasdi. "Chelsi" bilan o'yindagi o'sha jirkanch xato Abduqodirga juda qattiq tasir ko'rsatgandi. O'yinlar ko'p emasmi, vaqt o'tib hammasi o'zgara bordi.

Mohir himoyachilar Diash va Gvardiol jarohat oldi. Balki shu jarohatlar bo'lmaganida yosh o'spirin uchun yangi yil mavsumi ham zerikarli boshlangan bo'larmidi. O'zbekistonga legioner Angliyaga kelganidan beri oradan 12 oy o'tib etakchilar jarohati yana Abduqodirga imkoniyat yaratdi. U qorong'i o'radan chiqa boshladi, uzoqdan yorug'lik ko'rindi. Husanov zudlik bilan asosiy tarkibga qaytishi kerak edi.

Tez orada u "Brayton", "Ekseter" va "Nyukasl" bilan o'yinlarni boshlang'ich tarkibda o'tkazdi. Jamoada 20 yoshli Maks Alleyni hisobga olmaganda, Husanov "Siti" himoyasidagi eng katta futbolchilardan biri bo'lib qoldi. "Ekseter" bilan o'yindagi 10:1 hisobida g'alabaga Husanov katta hissa qo'shdi, u juda erkin harakat qildi. Undan oldin "Brayton"ga qarshi bahs ham yuqori saviyada o'tdi. Angliya Kubogidan o'rin olgan "Nyukasl" bilan 2:0 hisobidagi o'yinda ham Husanov o'zidan iliq taassurot qoldirdi.

Shu o'yinlarda haqiqiy markaziy himoyachi jamoada borligi ko'zga tashlandi, unga nisbatan ishonch ortdi, Angliyada mustahkam himoya vakili shakllanib kelayotgani ko'rindi. "Sent Jeyms Park"da o'ynash hech qachon oson bo'lmagan, lekin Abduqodir va "Siti" mehmonda murakkab vazifani uddalay oldi.

"Nyukasl" mag'lub etilgan o'yinda Husanovning roli

O'yinni tahlil qilganda Husanovning harakatlariga alohida etibor qaratsa bo'ladi. Uchrashuvda VAR uzoq vaqt ishlaganini hamma ko'rdi. "Hakkalar" raqib darvozasi tomon atigi ikki marta zarba bera olishdi. Statistika bo'yicha "Nyukasl" uydagi har o'yinda o'rtacha 6ta zarba yo'llar ekan. "Siti"ga qarshi bellashuvda mezbonlar bu ishni amalga oshira olishmadi, aniqrog'i bunga "Siti" himoyasi yo'l qo'ymadi.

Olti bor to'pni toza olib qo'yish, to'rt marta "podkat" uslubida to'pga ega chiqish hamda bir marta 100 foizli "podkat" bilan to'pni qaytarib qolish - bu ishlarning hammasini Husanov bajardi. To'g'risi, Angliyada ideal darajada "podkat" qiladigan futbolchilar alohida qadrlanadi. APLda ro'yxatdan o'tgan 303 nafar futbolchini oladigan bo'lsak, "podkat"ni to'g'ri va samarali bajarish bo'yicha Abduqodir Husanov 91,7 foiz ko'rsatkich bilan APL 2025/26 mavsumining 5-o'rinida turibdi. Taqqoslash uchun Gvardiol 94,7 foiz bilan to'rtinchi egallagan.

Husanovda to'p uzatishlar ham joyida. Yana o'sha "Nyukasl"ga qarshi bahsni oladigan bo'lsak, eng ko'p to'p uzatishni amalga oshirgan futbolchi ham Abduqodir Husanov bo'ldi. U 58 marta to'p oshirib bu borada eng yaxshi ko'rsatkichni qayd etdi. Va uning to'p uzatishlari 93,5 foizga mo'ljalga to'g'ri etib borganini hisobga olsak, bu ham yaxshi natija hisoblanadi.

O'zbek futbolchisi rivojidan Gvardiola xursand

"U biz uchun o'ta muhim transfer", - deya aytib o'tdi Gvardiola shu hafta boshida. - "U bizga ko'p yordam beryapti, chunki biz ancha yuqorida o'ynaymiz va bunday vaziyatda orqada ishonchli himoya bo'lishi kerak. Husanovga shunday o'ynash yoqadi. Vaqt o'tishi bilan uning foydasi yanada ko'proq tega boshlaydi. U hali yosh va ko'p narsa o'rganishi kerak. O'z navbatida menga ham u bilan ishlash, uni shug'ullantirish yoqyapti, chunki Husanov mashg'ulotlarga 100 foiz kuchini beradi".

Abduqodir Husanovning asosiy kaliti to'p bilan va to'psiz juda yaxshi o'ynay olishida. Bu yoshda unga yaxshi boshqaruvchi kerak, yanada kuchli himoyachi bo'lishi uchun etibor ko'proq berilishi talab etiladi. Abduqodir Angliyaga kelganidan beri oradan 12 oy o'tdi, bu orada u "Siti" tarkibida bir nechta o'yinlarni o'tkazdi. Lekin birinchi kungi Abduqodir bilan hozirgisi o'rtasida katta farq borligi yaqqol seziladi.

"Nyukasl"ga qarshi qiyin bahs ortda qoldi. "Siti"ni bugun yana bir qiyin uchrashuv kutyapti: jamoa Manchester derbisida "Yunayted"ga qarshi maydonga tushadi. Bu esa Husanov uchun yangi imtihon bo'ladi. To'g'ri, "Yunayted" hozir oldingi MYU emas. Lekin jamoada murabbiy o'zgardi va yangi murabbiy qo'l ostida raqib qanday o'yin namoyish etishini hech kim ayta olmaydi. Bu esa O'zbekiston milliy terma jamoasi futbolchisi uchun ham topishmoq bo'ladi. "Siti" "Arsenal"ga yana bosim o'tkazishi uchun bu o'yinni yutishga harakat qiladi.

X.Xoliqov tayyorladi.