Saudiya Arabistonidan navbatdagi yurish! "Al Ahli" "CHelsi" xarid qilmoqchi bo'lgan forvard uchun taklif summasini oshirdi
20 avg 2024 18:22
Yangiliklar

Saudiya Arabistonidan navbatdagi yurish! "Al Ahli" "CHelsi" xarid qilmoqchi bo'lgan forvard uchun taklif summasini oshirdi

Saudiya Arabistonining "Al Ahli" jamoasi Angliya terma jamoasi forvardi transferiga jiddiy kirishgan ko'rinadi.

Jiddaning "Al Ahli" jamoasi "Brentford" hujumchisi Ayven Tounini qo'lga kiritmoqchi va taklif etilgan summani yanada oshirdi.

"The Sun" nashrining xabar berishicha, arablarning dastlabki taklifi 35 million funt sterling bo'lgan va inglizlar bu taklifni rad etishgan. "Brentford" avvalroq Tounining transferini 70 millionga baholayotgandi, lekin forvardning o'zi klubini alishtirmoqchiligi tufayli "arilar" narxni biroz tushirishga rozilar.

Bundan tashqari, forvard uchun kurashda "CHelsi" ham ishtirok etmoqchi. "Futbolchilar inqirozi"ga uchragan londonliklar transfer oynasi yopilgunga qadar hujumchi sotib olmoqchi. "Arilar" taxminan 45 million funt (53 million evro / 58 million dollar) evaziga Touni bilan xayrlashishga tayyorlar.

O'z navbatida, Touni va uning oilasi Saudiya Arabistonidan bo'lgan taklifga yakuniy javoblarini hali aytishmagan.

Faoliyati davomida Ayven Premer-liganing 85 o'yinida maydonga tushgan va 35 ta gol urishga erishgan.