“Orol” safarda “Xorazm”dan mag'lubiyatga uchradi

Buni o'ziga xos “derbi” deb atash mumkin. Ushbu jamoalarning bu galgi uchrashuvi ham yuqori saviyada o'tdi.
  
Umuman olganda, bundan bir necha kun oldin bo'lib o'tgan 1-turda nukusliklar “Alanga” jamoasi ustidan juda yirik, 9:0 hisobida g'alaba qozonib, shov-shuvga sabab bo'lgandi. Bu “Orol”ning joriy yilgi mavsumda niyatlari jiddiy ekanligidan dalolat edi, go'yo. Biroq, jamoaning safardagi ilk uchrashuvi ushbu fikr-mulohazani chippakka chiqardi.
  
To'g'ri, bellashuvning dastlabki daqiqalarida mehmonlar ustunlikni o'z qo'llariga olishga urinib ko'rishdi. Biroq, urganchlik futbolchilar bunga yo'l qo'yishmadi. Bo'lim o'rtalariga kelib mezbonlar maydondagi ustunlikga ega bo'lishdi. Ilk xavfli hujum ham Vali Sultonov shogirdlari tomonidan amalga oshirilib, to'p darvozaga kiritilishi bilan yakun topdi. 25-daqiqada SHahzod Mannonovning nukusliklar jarima maydonchasi ichiga etkazib bergan to'pini Nihomjon Norov boshi bilan Ulug'bek Yangiboev qo'riqlayotgan darvoza to'riga yo'lladi. Bir daqiqa o'tar-o'tmas SHahzodning jarima zarbasini esa darvozabon qiyinchilik bilan bartaraf etdi. Uchrashuvning 30-daqiqasi mezbonlar uchun yana omadli keldi. Temur Ismoilov ikkinchi to'pni nukusliklar darvozasiga yo'lladi. Albatta, o'yinning bunday tus olishini mehmonlar kutishmagandi. SHu jihatdan, ular vaziyatni o'zgartirish maqsadida qator qarshi hujum uyushtirishga erishishdi. O'z navbatida Javlon Pirimbetov, Navro'z Xaipovlar to'p kiritish imkoniyatidan unumli foydalana bilishmadi. Ochig'i, urganchliklar darvozaboni G'ayrat O'daevning mahorati  bunga yo'l qo'ymadi.
  
Ikkinchi bo'lim ham hujumkor ruhda o'tishi bilan birinchisidan qolishmadi. Jamoalar qator xavfli vaziyatlarni yuzaga keltirishdi. SHunga qaramay, mehmonlar ham, mezbonlar ham hisobni  boshqa o'zgartira bilishmadi. SHu tariqa, “Orol” futbolchilari uylariga mag'lubiyat alamida yo'l olishdi.
  
Vali SULTONOV (“Xorazm” jamoasi bosh murabbiyi):  - Bu uchrashuv hujumkor  tarzda kechdi. SHogirdlarim ko'rsatmalarimga to'liq rioya qilgan holda harakat qilishdi. Asosiysi, mehmonlarning o'yin uslubini izchil o'rganganimiz va shunga yarasha tayyorgarlik ko'rganimiz tufayli muhim g'alabani qo'lga kiritdik. Muxlislarimizga chiroyli g'alabani tuhfa etganimizdan juda xursandmiz.

“Xorazm” (Urganch) – “Orol” (Nukus) – 2:0 (2:0). Yangibozor tumani markaziy o'yingohi.
Hakamlar: I. Gormashev (Toshkent), A. Kalinin (Qarshi), Z. Eshboev (Qarshi), A. Alimov (Urganch).
“Xorazm” :  G'. O'daev, SH. Mannonov, A. Husinov, J. Otajonov, T. Ismoilov, M. Abdullaev, M. Quronboev (M. Qudratov, 86), R. Bayramov (S. Jumaniyozov, 46), N. Norov (J. Egamov, 82), I. Xayrov (T. Bekchanov, 62), M. Quryozov (X. Quryozov, 88).
“Orol” : U. Yangiboev, E. Seytnazarov (N. Talasboev, 57), J. Pirimbetov, A. Reimov, M. Qarliboev(SH. Quttiboev, 71), D. Nizanov, N. Xaipov(A. Ro'zimov, 55), M. Abdumuratov, M. Avezniyozov I. Seytnazarov, A. Ilyosov(SH. Karimboev, 84).
To'plarni N. Norov (25), T. Ismoilov (30) kiritishdi.
Ogohlantirishlar: J. Otajonov (35), T. Ismoilov (76), S. Jumaniyozov(85) – I. Seytnazarov(15), M. Abdumuratov(29), M. Avezniyazov(32), D. Nizanov(70).
Nazoratchi: M SHaripov (Buxoro).


   
Ikrom XUDOYBERGANOV