Ermatovdan o'yinni yaxshi boshqarishni kutib qolamiz

Bugun “E” guruhida 1-tur bahslari start oladi. Braziliya poyxatida bo'lib o'tadigan SHveycariya va Ekvador o'rtasidagi o'yinni hamyurtimiz Ravshan Ermatov boshchiligidagi hakamlar brigadasi boshqarib boradi. Bu uchrashuvda biz uchun Ermatovning yaxshi ishlashi o'yin natijasidan ham muhim. Yaxshi bilasiz, bundan to'rt yil JARda o'tkazilgan mundialda debyut qilgan Ermatov tezda og'izga tushib, uning shaniga har tomondan maqtovlar yog'ilgandi.

Natijada FIFA ham unga to'liq ishonch bildirib, beshta o'yinni boshqarishiga imkon yaratib bergandi. Mana o'shandan beri oradan to'rt yil o'tdi va bu orada Ermatovning tajribasi ancha oshdi. Ravshan Ermatov yana bir marotaba O'zbekiston nomini dunyo futboli jamoatchiligiga tanitishi uchun bugungi bahsni alo darajada boshqarib borib lozim. Nafaqat o'zi va yurti uchun, balki Osiyo hakamlari shani uchun ham. Nishimuraning xatosidan so'ng biz osiyolik hakamlar katta o'yinlarga hali tayyor emas kabi gaplar bilan chalg'ib qolishni xohlamaymiz. Buning uchun Ermatov va uning yordamchilari uchrashuvni yaxshi boshqarishlari kerak, shundagina FIFAning qitamiz hakamlariga bo'lgan ishonchi yanada ortadi.

O'yin boshlanishiga tobora oz vaqt qolmoqda. Bahsga Toshkent vaqti bilan soat 21:00dan boshlab start beriladi. Bugungi o'yinda Ermatovga yon qanotlarda odatdagidek Abdulhamid Rasulov bilan Bahodir Qo'chqorov ko'mak berishadi. Albatta, birinchi o'yinda hayajon bo'lishi turgan gap, biroq hakamlarimiz tajribali, ular hayajonni tezda engib o'ta olishadi. Xorij OAVda Ermatovning hatto jahon chempionati finalini boshqarishi mumkinligi haqida yozishyapti. Lekin finalgacha ancha bor, hozir esa eng muhimi birinchi o'yinni yaxshi o'tkazib olish. SHu o'rinda Ermatov va uning brigadasiga bugungi bahsni xatolarsiz boshqarishini Yaratgandan so'rab, ularga omad tilab qolamiz. Olg'a, o'zbek o'g'lonlari!!

X.Xoliqov.