“Dinamo” – “Lokomotiv”: Mezbonlar ketma-ket beshta mag'lubiyatni yo'qqa chiqara olishadimi?

SHu paytgacha 9 ochko jamg'argan “Dinamo” 12-o'rinda, 24 ochko yiqqan “Loko” esa birinchi o'rinda bormoqda.

CHempionatni har holda yomon boshlamagan “Dinamo” nima uchuydir oxirgi paytlarda mag'lubiyatlar o'chog'idan chiqolmay qoldi. Ne ajabki, jamoa ketma-ket beshta uchrashuvda mag'lub bo'ldi: o'z maydonida “Paxtakor” va “Mashal”dan, safarda “Qizilqum”, “Olmaliq” va “Neftchi”dan engildi. Albatta, bu mag'lubiyatlar oqibatida Ravshan Haydarovning boshi ancha qotgani turgan gap. Ehtimol jamoada ruhiy tushkunlik yuzaga kelgan bo'lishiyam mumkin.

Umuman olganda, “Dinamo” uy uchrashuvlarida bir marta zafar quchdi: ikkinchi turda “Metallurg” ustidan. “Lokomotiv” esa hozircha chempionatdagi mag'lubiyatsiz yurishini davom ettirmoqda. Jamoa safarda “Paxtakor” bilan durang o'ynaganidan beri ketma-ket uch uchrashuvda g'alaba qozondi. Vadim Abramov shogirdlari hozirgi vaqtda o'z o'yinlarini topib olishgan desa bo'ladi. “Lokomotiv” safarda faqat “Bunyodkor” va “Paxtakor” bilan durang o'ynadi, qolgan raqiblarini esa mag'lubiyatga uchratdi.

Bundan ko'rinib turibdiki, bugun “Dinamo”ga oson bo'lmaydi. Albatta, “Dinamo” ketma-ket oltinchi mag'lubiyatni qabul qilib olmaslik uchun harakat qilishi turgan gap. “Lokomotiv” esa “Bunyodkor”ning kechagi durangidan so'ng amaldagi chempion bilan oradagi farqni uzaytirishga harakat qiladi.

X.Xoliqov.