Urmat Abdukaimov: "Hakamlarning qarorlari futbolchilarning faoliyatiga katta tasir o'tkazadi. Hakamlar ham shuni bilishi va his qilishi kerak"

"Men yigitlardan mag'rurlanaman. Mundial ishtirokchisiga qarshi munosib o'ynadik. Afsuski bugungi uchrashuvda o'zimizga bog'liq bo'lmagan sabablar tufayli mag'lub bo'ldik. Ushbu musobaqa mamlakatimiz shanini munosib himoya qilgan barcha futbolchidan minnatdorman" - dedi Urmat Abdukaimov.

- Erjan Tokotaevning holati qanday?

- Uning holati haqida malumotga ega emasman, uni shifoxonaga olib ketishdi. Shu sababli Tokotaev kiyinish xonasida ko'rinish bermadi. Lekin eng kamida bosh chayqalishi bor edi.

- O'yinga tuzgan rejangiz qaysi vaziyatda ishlamay qoldi?

- Bir kishi kam bo'lib o'ynash qiyin. Ustiga-ustak raqib mahorat jihatdan kuchliroq bo'lganida. Chetlatishga qadar barchasi yaxshi edi, biz yaxshi o'ynab turgandik. Ketma-ket ikkinchi o'yindan buyon VAR qarori o'yin taqdiriga tasir o'tkazmoqda. Hakamlarning qarorlari futbolchilarning faoliyatiga katta o'tkazadi. Hakamlar ham shuni bilish va his qilishi kerak. Hakamlar ham xato qiladi. Har bir inson xatoga yo'l qo'ygani kabi. Imkon qadar shunday xatolar kamaysa yaxshi bo'lardi.

- O'monga qarshi o'yindan keyin ham hakamlik haqida gapirgan edingiz. Bugun ham shu haqda aytib o'tdingiz. Kuni kecha Karlush Keyrush ham ijtimoiy tarmoqdagi sahifalaridan birida hakamlik bo'yicha norozilik bildirdi. Ushbu musobaqadagi hakamlik darajasiga qanday baho berasiz? Masalan, O'zbekiston - Qirg'iziston uchrashuvida tojikistonlik hakam ishladi...

- O'tgan o'yindagi vaziyatlarni ko'rib chiqdim. Bekor qilingan gollarimiz mayli, lekin raqib futbolchisi qizil kartochka bilan jazolanishi kerak edi. Bir xil vaziyat ikki xil talqin qilinmoqda. Bugungi uchrashuvdagi vaziyatlarning takrorini hali ko'rganim yo'q, balki hakam to'g'ri qaror chiqargandir. Birinchi hissiyot salbiy bo'ldi. Kiyinish xonasida ham futbolchilar bilan shu haqda gaplashdik. Qizil kartochka masalasida savollar bor.

Bilasizmi, men barchasini tushunaman. Biz Markaziy Osiyo mamlakatlarimiz va bir xil mentalitetga egamiz. Ushbu qarorlarning sababini ham tahminan bilaman. Bunga bizning mentalitetimiz sababchi. Futboldagi hamkorlik qanday olib borilishi bunga sabab.

- Jamoangiz raqib darvozasi oldida deyarli xavfli vaziyat yarata olmaganiga nima sabab bo'ldi deb o'ylaysiz? Hujumdagi sust harakatlar yoki raqib himoyasining kuchligigi?

- Qizil kartochkaga qadar O'zbekiston bizning darvozamizga bitta aniq zarba yo'llagan edi. Biz raqib pressing ostidan chiqib ketayotgan edik. Shuningdek, ushbu musobaqada to'liq tarkibimiz bilan ishtirok etmayapmiz. Ayrim futbolchilarimiz Osiyo Kubogi U23 saralash musobaqasida ishtirok etmoqda. Raqib tarkibini ham to'g'ri baholashimiz kerak. Bugun terma jamoamiz tarkibida uch nafar futbolchi debyut qildi.

- Tokotaev va Kojo kabi terma jamoa etakchilari O'zbekiston chempionatida to'p tepishmoqda. O'zbekiston chempionatining darajasiga qanday baho berasiz?

- Superliga o'yinlarini stadiondan turib ko'rmaganman, ammo daraja ancha yuqori deb ayta olaman. Ayniqsa bizning chempionatimiz bilan solishtirganda. Masalan, o'zbek klublari OCHL musobaqalarida muntazam ishtirok etadi. Bizda esa faqatgina bir jamoa, u ham bo'lsa OFK Chaqiruv Kubogida. Qirg'iz futbolchilari Superligada o'ynashi terma jamoa uchun foydali bo'ladi.