Chempion bilan durang o'ynagan murabbiy, superseyv amalga oshirgan posbon, ikkita gol urgan futbolchi - Superligada 9-turning eng yaxshilari
12 may 16:41
Yangiliklar

Chempion bilan durang o'ynagan murabbiy, superseyv amalga oshirgan posbon, ikkita gol urgan futbolchi - Superligada 9-turning eng yaxshilari

Championat.asia sayti O'zbekiston Superligasi 9-turining eng yaxshilarini aniqladi.

Championat.asia sayti talqiniga ko'ra 9-turning eng yaxshi darvozaboni – Botirali Ergashev ("Neftchi")

Bu turda "Neftchi" vodiy derbisida "Andijon" mehmoni bo'lib, 2:0 hisobida g'alaba qozondi. Farg'onaliklar posboni o'yin davomida bir nechta seyvlari bilan jamoasini qutqardi. Ayniqsa 21-daqiqada jarimadan yo'llagan zarbadan keyin Ergashev superseyv amalga oshirdi. Shu orqali u Championat.asia ijodkorlari tomonidan 9-turning eng yaxshi darvozaboni deya etirof etildi.

Championat.asia sayti talqiniga ko'ra 9-turning eng yaxshi murabbiyi – Ilyos Zeytullaev ("Bunyodkor")

"Bunyodkor" bu tur Qarshida amaldagi mamlakat chempioni "Nasaf" klubi mehmoni bo'lib, 2:2 hisobida durang o'ynadi. Zeytullaev shogirdlari ikki marta hisobda ortda qolib yakunda mag'lubiyatdan qutulib qolishdi. "Bunyodkor" Qarshidagi mag'lubiyatsiz seriyasini davom ettirdi. Shu tariqa yosh murabbiy 9-turning eng yaxshi murabbiyi deb topildi.

Championat.asia sayti talqiniga ko'ra 9-turning eng yaxshi futbolchisi – Asadbek Sobirjonov (OKMK)

OKMK bu tur vodiyda "Qo'qon-1912" mehmoni bo'lib, 3:1 hisobida irodali g'alabaga erishdi. Olmaliqliklar 72-daqiqaga qadar 0:1 hisobida yutqazishayotgandi, 64-daqiqada zaxiradan maydonga tushgan Asadbek Sobirjonovning ikkita goli OKMKga muhim g'alabani keltirdi. Shu tariqa Sobirjonov 9-turning eng yaxshi futbolchisi sifatida etirof qilindi.

Championat.asia sayti talqiniga ko'ra 9-turning eng chiroyli goli muallifi – Oybek Bozorov ("Nasaf")

"Nasaf" bu tur o'z maydonida "Bunyodkor"ni qabul qilib, 2:2 hisobida durang o'ynadi. Mezbonlar safida Oybek Bozorovning goli chiroyli chiqdi. U jarima maydoni ichida to'pni Mozgovoydan qabul qilib, bir harakat bilan ikki raqib qurshovidan chiqib ketib, to'pni darvozaning yuqori burchagiga aniq yo'lladi. Shunday qilib, Bozorov Championat.asia sayti talqinida turning eng chiroyli gol muallifi deb topildi.