Botir Nosirov: "Nasaf" eng yaxshi o'yinini ko'rsatdi"

Muborakliklar tarkibida harakat qilgan Botir Nosirov uchrashuvdan keyin o'z fikrlarini bildirib o'tdi.

- Albatta derbilar har doim qiziqarli va keskin ruh ostida o'tadi. Ilgari vodiy derbisida bir necha bor ishtirok etganman. Bu safar esa qashqadaryo derbisida o'ynadim. Bundan xursandman, - deya gap boshladi Botir Nosirov.

- O'yinga keladigan bo'lsak, Qarshiga faqat ijobiy natijaga erishish uchun borgandik. Bilasangiz kerak, jamoamiz safarda bungacha yutqazmay kelayotgandi. Nasaf bilan o'yinda ham ushbu ananani davom ettirishni xohlagandik. Afsuski mag'lubiyatga uchradik.

- Aytish kerakki, mezbonlar haqli ravishda g'alaba qozondi. Ular butun o'yin davomida bosim o'tkazdi. Durangni ushlab qola olmaganimiz ruhiy tasir o'tkazdi. Butun o'yin davomida etiborim to'pga qaratildi. Himoyachilarga gapirib, yo'l-yo'riq ko'rsatib tura olmadim. Balki shunday qilganimda bunchalik ko'p to'p o'tkazib yubormagan bo'larmidik... Endi yo'l qo'ygan xatolardan to'g'ri xulosa chiqarib olishimiz kerak.

- "Nasaf"ning oldin o'tkazgan o'yinlarini ko'rib chiqqandik. Bizga qarshi uchrashuvlarda ular eng yaxshi o'yinini ko'rsatdi.

- Ushbu mag'lubiyatdan keyin murabbiylar o'yin video tasmasini bizga qo'yib, taxlil qilib beradi. Qaerda qanday xato qilgan bo'lsak, kelgusida ularni bartaraf etishga xarakat qilamiz.

- Birinchi davraning so'nggi turida "Metallurg"ga qarshi o'ynaymiz. Sariq kartochkalarim soni 4taga etdi. Endi bo'lajak bahsda jamoamga yordam bera olmayman. Lekin shuni aytishim mumkinki, "Metallurg" bilan o'yinda faqat 3 ochko uchun o'ynaymiz va birinchi davrani 5-o'rinda tugatamiz.

Islombek Rustambekov.