Argentina - Bosniya va Gercegovina 2:1. MATNLI TRANSLYACIYA

JCH-2014. "F" guruhi, 1-tur.

Argentina - Bosniya va Gercegovina 2:1
16 iyun. 03:00

Gollar: Kolashinac (3 - o'zdarvozasiga), Messi (65), Ibishevich (84)

Bosh hakam: Joel Aguilar (Salvador)
Yordamchi hakamlar: Villiam Torres (Salvador), Juan Zumba (Salvador)
Zaxira hakami: Jamol Haimudi (Jazoir)

Argentina: Romero, Garay, Kampanyaro (Gago, 46), Sabaleta, Di Mariya, Messi, Rodrigez (Iguain, 46), Maskerano, Roxo, Fernandez, Aguero (Biglia, 87).

Bosniya va Gercegovina: Begovich, Bichakchich, Spaxich, Kolashinac, Besich, Pyanich, Misimovich (Medunyanin, 74), Jeko, Mujya (Ibishevich, 69), Lulich, Xayrovich (Viska, 71).

Ogohlantirishlar: Roxo (25), Spaxich (63)

 


                            MATNLI TRANSLYACIYA
                                       YANGILASH



Uchrashuv yakunlandi! Argentina qiyin bo'lganda o'yinda uch ochko egasiga aylanmoqda!

90` Uchrashuvning ikkinchi bo'limiga 3 daqiqa vaqt qo'shib berildi.

89` Messi jarohat olib maydonda yotibdi.

88` Bosniyaliklar butun jamoa bo'lib oldinga borishmoqda.

87` Serxio Aguero o'rniga Lukas Biglia tushirildi. Argentina himoyaga etibor qaratishga majbur!

86` Qolgan daqiqalar ancha qaynoq o'tadigan ko'rinadi...

84` GOOOOOOOOOOOOOOOOOOOOOOOOL! Ibishevich! Argentina jazolandi! Ibishevich Romeroning oyoqlari orasidan to'pni darvozaga yo'llab qo'ydi, 2:1!

84` Di Mariya maydon markazidan katta tezlikda raqib jarima maydonchasi tomon kirib bordi va to'pni jamoadoshiga uzatishda xatoga yo'l qo'ydi.

81` Argentinaning qarshi hujumi! Messi-Aguero-Messi-Aguero! So'nggi pallada himoyachilar xavfni bartaraf etishdi!

78` Messi Iguainga to'pni etkazib berdi. Iguain esa boshi bilan darvozani ishg'ol etishga harakat qilgan edi. Ammo biroz noqulay kelgan to'p, darvozaga aniq bormadi.

76` Bosniya va Gercegovina vaziyatni to'g'irlash maqsadida oldinga intilmoqda. Lekin hozircha ularga raqib darvozasini nishonga olish nasib etmayapti.

74` Misimovich o'z o'rnini Medunyaninga bo'shatib berdi.

72` Bosniya va Gercegovina tarkibida yana o'zgarish. Xayrovich o'rniga Viska tushdi.

71` Argentina yana va yana oldinga bormoqda. Di Mariyaga nisbatan qo'pollik. Jarima zarbasi.

70` Bosniyada o'zgarish. Mujya o'rniga Ibishevich tushdi.

69` Bosniya va Gercegovinaga qolgan daqiqalarda qiyin bo'ladi.

68` Argentina sardori jamoasi uchun muhim bo'lgan golni kiritdi.

66` GOOOOOOOOOOOOOOOOOOOOOOOOOL! Messi! Messi raqib jarima maydonchasi ichida kirib bordi va jamoadoshi bilan "devor" usulida o'ynab, o'zini qulay vaziyatga chiqardi. Zarba va gol!

66` Messining jarimadan tepgan zarbasi noto'g'ri ketdi.

65` Emir Spaxich ogohlantirish oldi.

64` Aytgancha, Jeko deyarli o'yinda ko'rinmayapti. Jamoadoshlari unga vaziyat yaratib bera olishmayapti. Jekoning o'zi ham hozircha faol emas.

63` Jeko o'yindan tashqari holatda qolib ketdi.

61` Begovich hozir jamoasini goldan qutqarib qolmoqda. Argentina ikkinchi bo'limni hujumkorlik bilan o'tkazmoqda. Bosniya ham to'pni egallashi bilan oldinga intilmoqda.

59` Lulich jamoasi hujumini buzib qo'ydi. Bosniyaliklarning harakat yaxshi. Ammo so'nggi pallada ularga tajriba etishmayapti.

58` Bosniya va Gercegovina pozicion hujum uyushtirmoqda.

57` Argentina ko'pchilik bo'lib oldinga bormoqda.

56` Endi navbat Argentinaga! Agueroning zarbasi noaniq ketdi.

55` Xayrovich gol kiritishni juda ham istamoqda. Yana kuchli zarba va yana Romero mahorat ko'rsatmoqda.

53` Bosniya va Gercegovina Argentina himoyasiga bosim o'tkazmoqda.

52` Argentina 4-3-3 sxemasida o'yinni davom ettirmoqda.

51` Xayrovichning ajoyib zarbasini Romero egallab oldi.

50` Bosniya jarima zarbasi ishlab oldi. Xavfli nuqta!

49` Nihoyat Argentina hujumkorlikni oshiradigan ko'rinadi. Yarim himoyachi o'rniga hujumchi tushirildi.

47` Argentina tarkibida o'zgarish ruy berdi. Maksi Rodrigez o'rnida Gonsalo Iguain va Kampanyaro o'rniga Gago maydonga tushirildi.

46` Ikkinchi bo'lim boshlandi!

Aytgancha, uxlab qolish yo'g'-a?! Bu Jahon chempionati! To'rt yilda bir keladigan futbol bayramini to'liq his etib o'tkazishni unutmang! Uyquingiz kelayotgan bo'lsa, qahvani yordamga chorlang! Umid qilamizki, ikkinchi taym kelayotgan uyquni qochirib yuboradi!

Birinchi bo'lim tugadi. TANAFFUS!

45` Birinchi bo'limga 1 daqiqa vaqt qo'shib berildi.

44` Argentina hujum uyushtirdi. Lekin bosniyalik himoyachilar Messidan to'pni olib qo'yishdi.

43` Bosniya va Gercegovina birinchi bo'lim yakunini to'liq ustunlik bilan o'tqazmoqda. Argentina so'nggi uch-to'rt daqiqadan buyon maydon markazidan o'ta olganicha yo'q.

41` Lulich!!!! Romero!!!! Bosniya va Gercegovina burchak to'pini amalga oshirdi. Lulichning boshi bilan bergan zarbasini Romero qaytardi.

40` Ushbu o'yinning kutilmagan holati shu bo'lmoqdaki, Argentina ochiq va chiroyli o'yin uslubini o'rniga, zerikarliroq, yopiq o'ynashni afzal bilmoqda. Raqib darvozasi tomon yurishlar juda kam. Har holda Argentinadan hujumkor futbol kutilayotgan edi.... Di Mariya, Messi, Aguero kabi futbolchilari bor jamoa bu uslubda o'ynashi zerikarli tus olarkan.

38` Bichakchichga tibbiy yordam ko'rsatilmoqda.

37` O'yin teng kurashlar ostida kechmoqda. O'sha uchinchi daqiqadagi "omadsiz" epizod bo'lmaganida, hozir tabloda ham tenglik bo'lardi.

35` Nafaqat Maskerano, balki Jeko ham "o'qipti"! Jeko jarima maydonchasi oldidan Romero darvozasini nishonga olmoqchi bo'ldi. Ammo zarbaga aniqlik etishmadi.

33` Maskerano sharhni "o'qib" qoldi shekilli. To'pni qabul qilishi bilan uzoqdan zarba yo'lladi. Xavfli! Lekin Begovich bu zarbani bartaraf eta oldi. Bo'larkan-ku!

32` Jamoalar darvozalar tomon juda kam zarba yo'llashmoqda.

31` Rodrigezning uzoqdan yo'llagan zarbasi noaniq bo'ldi.

29` Qiziq, Argentina bugun besh himoyachi bilan o'ynamoqda.  To'g'ri, Sabaleta va Roxo qanotlardan ko'proq hujumga qo'shilishadi. Ammo ular himoyachi hisoblanishadi.

28` Argentina o'z maydonchasi oldida to'p bilan muomalada bo'lmoqda. Bosniyalik futbolchilar "pressing" qo'llashmoqda.

27` Bosniyaliklar jarima zarbasidan naf chiqara olishmadi.

26` Roxo ogohlantirildi. Jarima zarbasi.

25` Bosniya va Gercegovina hujum tashkil etmoqda.

22` Messi jarima maydonchasi ichida raqib himoyachilari aldashga kirishib ketdi. Lekin bir o'zi hech narsa qila olmadi. To'pni sheriklariga etkazgani maqsadga muvofiq bo'lardi. Yaxshi vaziyat qo'ldan boy berildi.

20` O'yin asta-sekin jonlanmoqda.

18` Argentina! Messi jamoasi ham jonlandi. Messining faolligi bilan boshlangan hujumni raqib himoyasi bartaraf etishni uddasidan chiqdi.

17` Argentina hozircha vaqtini himoyalanish bilan o'tkazmoqda.

15` Pyanichning jarimadan tepgan zarbasi "o'xshamadi".

14` Jarima zarbasi. Argentina darvozasi tomon.

13` UHHHHHHHHH deydigan vaziyat! Xavfli vaziyat! Bosniya uyg'onmoqda! Misimovichning faolligi hozir gol bilan yakunlanishi mumkin edi...

11` O'yin tempini yuqori deb bo'lmaydi. Jamoalar asosan to'p uzatishlar bilan ovora bo'lishmoqda. Keskinlik pastroq.

10` Argentina hozircha hujumga o'tayotgani yo'q. Bosniyaliklar biroz faollikni oshirishdi. Ular vaziyatni o'nglash uchun harakat qilishlari aniq.

8` Jeko jamoasi hujumga o'tmoqda. 

7` Bosniyaliklar hayajonni engib o'tib, oldinga intilishlari talab etiladi.

6` Jarima zarbasini Messi amalga oshirdi. To'pga Aguero boshi bilan zarba berdi va to'p maydondan tashqariga chiqib ketayotgan bir pallada, Kolashinacga tegib darvozadan o'rin oldi.

5` Bosniya va Gercegovina uchun mundialdagi debyut o'yin  omadsiz start olmoqda. Ayniqsa Kolashinac uchun.

3` GOOOOOOOOOOOL! Kolashinac o'z darvozasini ishg'ol etib qo'ydi, 0:1!

3` Mujya Agueroga nisbatan qoidani buzdi. Jarima to'pi.

2` Bosniyaliklar uchun bu mundialdagi debyut o'yin.

1` Uchrashuvga start berildi! Demak mashhur "Marokana" stadionida Argentina - Bosniya va Gercegovina terma jamoalari o'rtasidagi bahs boshlandi!

Endi navbat Bosniya va Gercegovina davlati madhiyasiga...

Bu safargi o'yinda madhiya kuylanmoqda. Argentina davlati madhiyasi jarang solmoqda...

Bugun Edin Jeko va Serxio Aguero bir-birlariga qarshi to'p surishadi. Bilasiz, bu ikki hujumchilar "Manchester Siti" sharafini himoya qilishadi.

Argentina va Bosniya va Gercegovina jamoalari maydonga chiqib kelishmoqda.

Jamoalar o'yinoldi chigalyozdi mashg'ulotlarni yakunlashdi.







Bu o'yinni sharhida SHahboz Beg'amov ishlaydi.

Assalomu aleykum qadrli futbol ishqibozlari! Barchaga xayrli kech! Futbol muxlislarini Jahon chempionatining yana bir qiziqarli bellashuvi Argentina - Bosniya va Gercegovina o'rtasidagi uchrashuv kutib turibdi. Bugun Messi etakchiligidagi jamoa Braziliyadagi mundialda o'z yurishini boshlaydi.


- Uchrashuv soat 03:00da boshlanadi.