24 yoshli darvozabon, amaldagi chempionni yutgan murabbiy, termaga chaqirilmaydigan vinger, turni bezab beruvchi golni urgan xavbek - Superligada 28-turning eng yaxshilari

 — Superligada 28-turning eng yaxshilari

Championat.asia sayti talqiniga ko'ra, 28-turning eng yaxshi darvozaboni – Azizxon Isaqov ("Qo'qon-1912")

"Qo'qon-1912" bu turda "Paxtakor" bilan murosa ko'chasini tanladi (0:0). Ushbu natija qo'lga kiritilishida qo'qonliklar posboni Azizxon Isaqovning o'rni beqiyos. "Paxtakor" futbolchilari uchrashuv mobaynida bir qator zarbalarni yo'lladi, ammo Isaqov darvozasidan to'p olib chiqmadi va sheriklarini sergaklikka chaqirib turdi. U ikki holatda esda qolarli seyv namoyish qildi. Shunday qilib, Isaqov Championat.asia vakillari tomonidan turning eng yaxshi darvozaboni deb topildi.

Championat.asia sayti talqinida 28-turning eng yaxshi murabbiyi – Otabek Narzullaev ("Mashal")

Turning haqiqiy sensaciyasi Qarshida ro'y berdi. "Mashal" mehmonda "Nasaf"ni mag'lub etdi (2:1). Uchrashuv asosan qarshiliklar ustunligida kechgan bo'lsa-da, muboraklilkar bosh murabbiyi Otabek Narzullaevning rejasi yakunda ish berdi. Uning amalga oshirgan o'zgarishlari ortidan "Mashal" ikkinchi bo'limda ham gol urishning uddasidan chiqdi va bu gol aynan g'alaba keltirdi. Shu tariqa, "Mashal" ustozi Otabek Narzullaev tur murabbiyi sifatida etirof etildi. 

Championat.asia sayti talqiniga ko'ra, 28-turning eng yaxshi futbolchisi – Xurshid G'iyosov (OKMK)

OKMK bu turda "Navbahor"ni mehmon qilib, ishonchli hisobda g'alabaga erishdi (3:1). Uchrashuvda olmaliqliklar vingeri Xurshid G'iyosov katta sahnaga chiqdi. U gollarning barchasida bevosita ishtirok etdi. Birinchi gol aynan uning yorib kirishidan so'ng urilgan bo'lsa, ikkinchi golda u hujumni keskin tusga olib kirgandi. Shuningdek, kiritilgan uchinchi to'pda ham G'iyosov Abdurazzoqovni qulay pas bilan taminladi. Shunday qilib, terma jamoadan hech ham chaqiruv olmaydigan OKMK vingeri 28-turning eng yaxshi futbolchisi deb topildi.

Championat.asia sayti talqinida 28-turning eng chiroyli goli muallifi – Jasur Jaloliddinov ("So'g'diyona")

"So'g'diyona" yakuniga etgan turda "Xorazm" bilan bahs yuritib, 2:0 hisobida zafar quchdi. "So'g'diyona"ning ikkinchi goli 90+3-daqiqada jizzaxliklar yarim himoyachisi Jasur Jaloliddinov tomonidan urildi, urilganda ham juda chiroyli tarzda urildi deb bemalol aytolamiz. Jaloliddinovning zarbasi deyarli 16 metr masofadan oyoqning tashqi tomoni orqali yo'llandi va to'p traektoriyasi biroz o'zgarishi oqibatida uni qaytarishga xorazmliklar darvozaboni shunchaki ojiz qoldi. Shu tariqa, Championat.asia xodimlari mazkur golni turni bezab bergan gol sifatida qayd etdi.