"Спортинг" раҳбари Гёкерешнинг йиғинга келмагани ҳақида: "Даҳолар босим ўтказиш орқали трансферни осонлаштирамиз деб ўйлашади, аммо бу уни қийинлаштиради. Ҳаммаси катта жарима ва кечирим сўраш билан ҳал бўлади"

Ҳужумчи аввал режалаштирганидек мавсумолди тайёргарлигига қайтмади. Хабар қилинишича, футболчи шу йўл билан Португалия клубини ўзини "Арсенал"га сотишга кўндирмоқчи.

Швециялик аллақачон "Спортинг" президенти Фредерик Варандашни клубда бошқа ўйнамаслиги ҳақида хабардор қилгани ҳақида хабарлар тарқалган эди.

"Хотиржаммиз. Трансфер ойнаси ёпилиши, катта жарима ва жамоадан узр сўраш орқали ҳаммаси ҳал бўлади. Агар улар ("Арсенал" - Championat.asia) Виктор Гёкереш учун адолатли бозор нархини тўлашга тайёр бўлмаса, биз уни яна уч йилга олиб қолишдан хурсанд бўламиз.

Агар бу стратегия ортида турган даҳолар шу йўл билан унинг кетишини осонлаштириш учун менга босим ўтказяпмиз деб ўйлашса, улар нафақат хато қилишади, балки трансфер шартларини янада мураккаблаштириб юборишади.

Ҳеч ким клуб манфаатларидан юқори турмайди - ким бўлишидан қатъи назар", - деди "Спортинг" президенти Фредерик Варандаш Lusa агентлигига берган интервьюсида.

Гёкерешнинг шартномаси 2027/28 йилги мавсум охиригача мўлжалланган. Унда 100 миллион евро миқдорида товон пули белгиланган.