Шуҳрат Муҳаммадиев: "Терма жамоа сафидан жой олиш бу улкан шараф"

Ўйин ҳақида нима дейиш мумкин, қийин ва асабий кечган муҳим учрашувда биз ҳақли равишда ғалаба қозондик. Биринчи бўлимда "Бунёдкор" бир-иккита вазиятлар ярата олди. Иккинчи таймда эса уларга ҳеч қандай имкон бермадик. Шу куни биз рақибдан кучли ўйнадик ва муҳим бўлган уч очкони қўлга киритдик.

-Терма жамоадан чақирув олдингиз. Бу янгилик сизга қандай таъсир кўрсатди?
- Албатта, бу мени жуда қувонтирди. Бу хабарни эшитиб, хурсанд бўлганим рост. Ҳар бир футболчи учун терма жамоа сафидан жой олиш бу улкан шараф.

- "Насаф" таркибида кўрсатаётган ўйинларингизни МТЖ сафида ҳам кўрсата оласизми? Айтмоқчи бўлганим, терма жамоа либосида янада юқори сифатли футбол ўйнаш керак.
- Тўғри, кўпчилик ўз клуби сафида яхши ўйнаши мумкин. Лекин терма жамоа либосини кийганда ўша ўз ўйинини ҳам кўрсата олмай қолиши мумкин. "Насаф"да биз бир-биримизни сўзсиз тушуниб ўйнаймиз. Жамоамизда ички муҳим аъло даражада. Бу нарса ҳам футболчининг ўз ўйинини кўрсатишига ва юксалишига сабаб бўлади. Мен қандай ўйин кўрсатаётганимни билмайман, агарда қандайдир поғона кўтарила олган бўлсам ҳам, бу ерда клубнинг ва жамоадошларимнинг ҳиссалари катта. Терма жамоа таркибида ҳам яхши ўйинлар орқали билдирилган ишончни оқлашга ҳаракат қиламан. Миржалол Қосимов томонидан берилган имкониятдан унумли фойдаланиб қолишга ва мухлисларимиз кутаётган ўйинларни кўрсатишга бор куч-ғайратимни сарфлайман.

Шаҳбоз Беғамов