Шоҳруҳ Ишанов: "Шогирдларим катта футболда ўйнаётгани улкан ютуғимиз"

"Аввало ОКМК жамоасини ғалаба билан табриклайман. Бугун қандай рақибга қарши ўйнашимизни билган эдик. Лекин шогирдларимга майдонда охиригача курашгани учун раҳмат айтаман",- дейди Шоҳруҳ Ишанов.

- Биринчи бўлимда "Андижон-SGS" дарвозабонида ўзига нисбатан ишонч етишмагандек кўринди. Аксарият ҳолларда келаётган тўпни қўлидан чиқариб юбораверди. Бу тажрибасизликданми ёки ҳаяжон?

- Албатта бундай жамоага қарши ҳаяжон бўлиши табиий. Шогирдларим катта футболда ўйнашяпти. Бу улкан ютуғимиз. Ҳаяжон ҳам вақти билан йўқолади, деб ўйлайман. Барибир даражада фарқ катта. ОКМК нафақат Ўзбекистон балки Осиёда ҳам ўз номига эга клуб ҳисобланади.

- Ҳимояда кўп тўп йўқотишлар бўлди. Шунга қарамай ҳимояда пас ўйнашни давом эттирдинглар...

- Футболчиларга тўпни шунчаки тепиб юбориш эмас, пас билан ҳимоядан чиқиш, шу орқали ҳужумни ташкил қилишни вазифа қилиб бергандик. Иккинчи бўлимда ҳам кўп нарсани ўзгартирмадик. Футболчилар ҳозир позицион ҳужум қилишни ўрганиши керак. 

- Шуни ҳисобига футболчилар турли финтларни қилишга киришиб кетишдими?

- Уларни қўллаб-қувватлайман. Шогирдларим характер кўрсатишга интилишди.