Сеид Сеидов: “Олий лигадан ким тушиб кетиши охирги турда ҳал бўлади”

Туркманистонлик мураббийнинг фикрлари қуйидагича бўлди.

-   Аввало “Пахтакор”ни ҳақли ғалаба ва қўлга киритилган чемпионлик билан табриклайман. “Пахтакор” бу мавсум ўзини кўрсата олди ва бунинг натижасида мавсум охирларига келиб чемпионликни нишонлади. “Пахтакор”нинг кучсиз томонлари йўқ ҳисоби, таркибда яхши футболчилар йиғилган ва бундай жамоага қарши тенгма-тенг баҳс олиб бориш осон эмас. Биз қўлдан келганча ўйнадик, ижобий натижа кўрсатишга ҳаракат қилдик, аммо қўлимиздан келмади. Бугунги кунда “Бухоро”нинг савиясини “Пахтакор” билан солиштириб бўлмайди. “Пахтакор” рақибга қараб тактика танлагани йўқ, балки ҳар доимгидек ўз ўйинини намойиш этди.

-   Ўйин давомида “Бухоро”нинг айрим ўйинчилари жамоа олий лигада қоладими ё тушиб кетадими, гўёки бунинг фарқи йўқдек ҳаракат қилишди?
-   Бу борада нима дейишим мумкин? Фикрингизга қўшиламан. Аксарият футболчилар учун чемпионат тугаб бўлди. Балки баъзи ўйинчилар аллақачон ўзларини бошқа жамоада кўраётган бўлиши мумкин.

-   “Бухоро”нинг олий лигада қолиш имкониятларини қандай баҳолайсиз?
-   Мен ҳар доим биз охиригача курашамиз деб айтиб келганман ва ҳозир ҳам шу фикрда қоламан. Менимча, олий лигани ким тарк этиши охирги турда ҳал бўлади. Имконият бизда ҳам, “Сўғдиёна”да ҳам бор. Иккита ўйинимиз қолди: сафарда “Динамо” ва уйда “Локомотив” билан. Мана шу беллашувлардан сўнг тақдиримиз маълум бўлади.

Х.Холиқов ёзиб олди.