Превью. Хитой - Сурия

Сианда ҳам бизни жуда қизиқарли учрашув кутмоқда. Хитой Сурияни қабул қилади. Ҳозирча бу жамоалар биттадан очко жамғаришган. Хитойда ўтадиган беллашув қайсидир жамоанинг олдинга ўтишини таъминлайди. Дуранг қайд этилган тақдирда буни Суриянинг фойдасига ёзиб қўйса бўлади. Саралаш босқичи старт олишидан аввал гуруҳ аутсайдери сифатида эътироф этилган жамоа ҳозирча бу гаплар нотўғри эканини исботлаяпти. Ўзбекистон ва Жанубий Кореяга қарши ўйинларда сурияликлар ёмон таассурот қолдиришмади.

Аксинча, Хитой кутилган футболни намойиш эта олмаяпти. Аввалги турда Эрон билан уйдаги баҳсда негадир хитойлик ўйинчиларнинг ҳаракатлари қовушмади. Балки, ортиқча босим уларга салбий таъсир қилгандир? Бунга жавобни бугунги беллашув беради. Суперлига ва терма жамоага сарфланаётган катта миқдордаги пуллар ҳозир ўйин сифатини яхшилаб бермагани кўзга ташланмоқда. Меҳмонлар қарши ҳужумлардан унумлироқ фойдалана олишса, уларда зафар қучиш учун яхши имкониятлар юзага келади. Бирор жамоанинг биринчи голи ўйин тақдирини ҳал этиши мумкин. Гуруҳимиздаги беллашувларда айнан шундай ҳолатга гувоҳ бўляпмиз.

Жамоа юлдузлари: Зенг Зи - Умар Харбин


Хитой – Сурия
6 октябрь 2016. Сиан. "Shaanxi Province" стадиони. 16:35
Бош ҳакам: Муҳаммад Тақи (Сингапур)