Мундиал олдидан. Ботирали Эргашев: "Асосий вазифамиз тўп ўтказиб юбормаслик"

Ёшларимиз сафига жалб этилган дарвозабон Ботирали Эргашев жамоамизни чемпионатида энг юқори марраларни кўзлаётганини яширмади.

"Жаҳон чемпионатига муносиб тайёргарлик кўрдик. Буни исботлашимиз керак. Халқимизни ишончини оқлашимиз керак. Майдонда ким ўйнашидан қатъий назар тўп ўтказмай ғалабага эришишни кўзламоқдамиз. Умуман олганда жуда катта мақсадлар билан тайёргарликка киришганмиз. Бизда барча шароит ва имконият етарли. Асосий ишимиз бу шароит ва имкониятларни оқлашдир" , - деди дарвозабонимиз Эргашев.

- Жамоанинг дарвоза чизиғида рақобат етарлича дея оламиз. Танловнинг кўплиги ижобий натижага қандай таъсир кўрсатади?

Бу жуда ҳам яхши деган бўлар эдим. Юқорида айтганимдек ким дарвозани қўриқлаши эмас, тўп ўтказмаслигимиз энг муҳимидир. Ҳамроев маҳоратли ва Каримов ҳам жаҳон чемпионатида иштирок этиб тажриба олди. Мен ҳам ишончни оқлашга ҳаракат қиламан. Рақобат бизда ўсишга хизмат қилади.

- Гуруҳ етакчиси Германия. Гуруҳдаги жамоалар ва уларнинг ҳужумчилари борасида фикрларингиз қандай?

Албатта, Германия жуда ҳам кучли жамоалардан биридир. Улар билан бир хил ўйнашга имкониятимиз етади. Улар жуда ҳам тез ва техникага экан. Уларни услубини ўрганмоқдамиз. Ҳар бир футболчиси индивидуал маҳоратга эга. Гондурас ҳам жуда ҳам бақувват футболчиларга эга. Фиджи ҳақида эса у даражада кўп маълумотга эга эмасман.

- Терма жамоадан қандай натижа кутсак бўлади?

Жамоа совринли ўринлар учун курашади. Вазифа ҳам чиройли ўйин кўрсатиб, натижага эришиш. Ҳаммамиз ўз кучимизга ишонамиз ва белгиланган маррани эгаллаймиз.