"Машъал"нинг қишки йиғини рақамларда

Янгиликлар матни Энди бор эътибор биринчи тур баҳсига қаратилади. Эртадан жамоамиз "Навбаҳор"га қарши тайёргарликни бошлайди ва 12 март кунидан бошлаб машғулотлар Наманганни ўзида давом эттирилади.

"Машъал" қишги йиғинни қандай ўтказгани борасида рақамларга яна бир бор қараб ўтамиз.

"Газчилар" декабрь ойидан бошланган йиғиндан шу кунга қадар 20 та назорат баҳсини ўтказди. Бу ўйинлар ичига ПФЛ кубоги баҳслари ҳам киритилади. 20 та назорат баҳсидан 12 тасида вакилларимиз ғалабага эришган. Беш марта йирик ғалабани нишонлади. 4 марта рақибларига имкониятни бой бериб қўйган. Бой берилган барча учрашувда рақиблар билан тўплар нисбати  биттани ташкил этган. "Пахтакор" (3:2), "Олмалиқ" (2:1), "Металлург" (2:1), "Қўқон-1912" (2:1) жамоаларига имконият бой берилди. Тўрт марта рақиблар билан муроса кўчаси танланган. "Локомотив", "Бунёдкор", "Шўртан", "Динамо" билан бир хил 2:2 ҳисобида дуранг ўйнадик.

Қишки йиғинда ўтказилган барча ўйинларда рақибларимиз дарвозасини 41 марта аниқ нишонга олган бўлсак, 19 марта ўз дарвозамиздан тўп ўтказиб юборилди.

"Машъал" биринчи турни 14 март куни сафарда Наманганнинг "Навбаҳор" жамоасига қарши ўтказади.