«Машъал» таништирув маросимини ўтказди

Маросимда клуб мутасадди раҳбарлари, жамоа мураббийлари ҳамда мухлислар клуби вакиллари иштирок этишди. Таништирув маросимида «Машъал»нинг янги аъзоларига рақамлар тушурилган янги либослари топширилди.

Унга кўра, Сардор Раҳмонов 3, Игор Тимонюк 31, Абдуллоҳ Олимов 77, Бобур Қосимов 22, Жамолиддин Убайдуллаев 9, Умеджон Шарипов 63, Асилжон Бегимқулов 44-рақамда учрашувларда майдонга тушишади.

Шунингдек жамоа бу мавсумда ҳам, Бельгиянинг «Patrick» фирмаси бренди туширилган либослардан фойдаланишади.

Сардор Раҳмонов: Очиғи яна «Машъал»да эканимдан жуда бахтлиман, жамоага қайтганим энг катта бахтимдир. Мен учун бу жамоа бегона эмас, ахир «Машъал» мени танитди ҳақиқий профессионал қилиб етиштирди. Янги мавсумда менга билдирилган барча ишончларни оқлайман ва мубораклик жонкуяр мухлисларимизни қувонтирамиз.

Абдуллоҳ Олимов: Муборакда эканимдан бахтлиман «Машъал»га келиб хато қилмадим, чунки бу жамоанинг ўз тарихи, ўз мавқеи бор. Бугун, ўзбек футболинг кўплаб юлдузларининг фаолиятига «Машъал» меҳнатлари беқиёсдир. Янги мавсумда жамоа билан янги марраларни забт этамиз худо хоҳласа. Фақат бизни суянчиғимиз бўлган мухлисларимиз бизни қўллаб туришса бўлди.

Бобур Қосимов: Мен «Машъал»нинг барқарор жамоалигини, ҳар қандай рақибни муаммолар гирдобида қолдиришига ишонаман. Бир сўз билан айтадиган бўлсам «Машъал» сафида яхшигина ўсишимга ишонаман ва жамоамизга янги мавсум давомида омад ҳамроҳ бўлишини тилаб қоламан.

Умеджон Шарипов: Аввало қардош ва қўшни юрт бўлган бутун, ўзбек халқини яқинлашиб келаётган «Наврўз» байрами билан чин кўнглимдан табриклайман. Азал-азалдан икки қўшни юрт халқи бир бирига дўст ва қадрдон бўлиб келган. Шунинг учундир балки мен «Машъал» сафида олдиндан, анча йил тўп тепгандекман. Муборак менга бегонадек туюлмаяпти, фаолиятимда бироз пасайиш бўлди. Мен буни албатта ўзгартираман ва ҳали «Машъал» билан буни исботлайман.

Жамолиддин Убайдуллаев: Янги жамоам менга жуда катта ишонч билдирди. Энди шундай ишончи оқламасам бу катта ҳурматсизликдир. Шундай экан, мубораклик мухлисларни худо хоҳласа албатта қувонтирамиз. Ўйлайманки узоқ вақтлар мобайнида “газчилар” таркибида фаолият олиб бораман.

Асилжон Бегимқулов: «Машъал» клубига келганимдан хурсандман. Албатта мухлисларсиз жамоа, жамоа эмас. «Машъал» келажаги бор жамоа, чунки «Машъал» жамоасини пойдевори академияси ҳисобланади шуни билган холда бу клубни танладим.

Игор Тимонюк: «Машъал» жамоасига келганимдан хурсандман. Мени жамоа аъзолари, раҳбарият ва мухлислар илиқ кутиб олишди. Жамоага тезда қўшилиб кетдим. «Машъал»да рақобат жуда кучли эканини биламан. Машғулотлар вақтида тинмай ишлаб асосий таркибда ўйнашга лойиқлигимни исботламоқчиман. Мухлисларни ўз ўйинларим билан хурсанд қиламан деган умиддаман.

"Машъал" матбуот хизмати