Фрэнк Лэмпард “Бавария” билан ўйиндан сўнг: “Жиддий сабоқ олдик”

“Асосий хатоларимиз майдонда жуда ҳам кўп бўш зоналар қолдирганимиз сабаб келиб чиқди. Кучни тўғри тақсимлай олмадик. “Бавария”нинг имкониятларини етарлича ўрганиб чиққандим, бироқ улар кеча икки баробар зиёд потенциалда ўйнашди. Шогирдларим барибир асосий эътиборни Левандовскига қаратишди. Натижада Гнабри кўп вазиятларда очиқ қолдирилди ва жазоландик. Иккинчи қаватдаги курашларда ҳам деярли ютқаздик. Меҳмонда бўла туриб улар жуда эркин ўйнашди. Айниқса, шогирдларимнинг тўп учун яккама-якка курашларда охиригача бормаганлиги менга ёқмади. Кетма-кет киритилган голлар жамоа руҳиятига салбий таъсир қилди. Шундан кейин улар ўйнамай қўйишди. 

Ҳакамлар борасида эътирозим йўқ. Учрашув бошидан охиригача адолатли бўлди дейишим мумкин. “Челси”дек клубнинг бир неча йиллардан буён шу плэй-офф босқичидан узоққа бора олмаётгани ачинарли ҳол. Лондоннинг ўзидаёқ жиддий сабоқ олдик, барчамиз учун оғир кеча бўлди. Кейинги ўйинга голлар ҳисоб-китобини қилиш учун бормаймиз. Ҳозир буни ўйлаганим йўқ. Шунчаки, инглизча футболни кўрсата олсак, ҳаммаси яхши томонга ўзгариши мумкин”, - дейди лондонликлар устози.

Эслатиб ўтамиз, бу жамоалар ўртасидаги жавоб баҳси 19 март куни Мюнхендаги “Аллианц Арена” стадионида бўлиб ўтади.