"Бухоро": Янги футболчиларни таништириш маросими ўтказилди

Ушбу тадбирда Бухоро вилояти ҳокими Мухиддин Турдиевич Эсанов, “Бухоро” жамоаси бош директори Алишер Ҳикматович Рустамов, Бухоро вилоят ҳокимлиги маданият ва спорт ишлари бошқармаси бошлиғи Жамшид Умарович Рашидов, “Бухоро” жамоаси маслаҳатчи мураббийи Тачмурад Шамакович Агамурадов, “Бухоро” жамоаси бош мураббийи Жамшид Жалолович Саидов ва “Бухоро” жамоаси футболчилари иштирок этишди.

Бухоро вилояти ҳокими Мухиддин Турдиевич Эсанов сўзга чиқар эканлар, қуйидаги фикрларни билдириб ўтдилар:

“Ассалому алайкум ҳурматли футбол ишқибозлар. Барчангизни кириб келаётган янги футбол мавсуми билан чин қалбимдан табриклайман. Бухоро футболи ўзбек футболида ўз ўрнига эга эканлигини ҳамма яхши билади. Муҳтарам юртбошимизнинг ташаббуслари билан бугунги кунга келиб барча спорт турларига жуда катта эътибор берилмоқда, хусусан футболга ҳам. Бу йилдан эътиборан Бухоро футболини, “Бухоро” жамоасини ўзлигига қайтаришни мақсад қилиб қўйдик. Бу ишни болалар футболидан бошлаймиз. Келаси йил наврўз байрамигача Бухоро шаҳрида замонавий шарт-шароитларга эга бўлган футбол академиясини очамиз. Бухорода исдеъдодлар талайгина, энди улар Бухоро футбол академиясида малакали мураббийлар қўл остида футбол сирларини ўрганишлари учун имконият пайдо бўлади.

Ўтган мавсум “Бухоро” учун жуда оғир йил бўлди, лекин бизни тўғри тушунган, жамоага садоқатлигини барчага кўз-кўз қилган мухлисларимизга раҳмат айтаман. Мухлислар  жамоани оғир дамларида ёлғизлатиб қўйишмадилар ва ҳақли равишда мана бир неча йилдир-ки, стадионга ташриф буюриш бўйича яққол етакчиликни қўлга олишмоқда.

Бундай ажойиб мухлислари бор жамоа, мухлислари ҳурмати юқори ўринларда бўлиши шарт! Шу муносабат билан янги кириб келаётган мавсумда “Бухоро” жамоаси олдига юқори мақсадларни қўйдик. Худо хоҳласи бу йил совриндорлар қаторидан ўрин олишни режалаштирганмиз ва шу билан бирга ОЧЛ га йўлланмани қўлга киритишга астойидил бел боғладик. Бу ишни амалга ошириш учун эса имкониятимиз ҳам, салоҳиятимиз ҳам етади.

Мухлисларимизга битта илтимосим ва талабим бор, мухлислик маданиятини оширайлик. Мухлислик маданиятини санъат даражасига кўтарайлик! Футбол қандай ривожланиб борса, мухлислик маданияти ҳам шунга мос тарзда ривожланиши шарт. 5 март куни бошланадиган чемпионатимизда 20 мингли тўлиб тошган стадионимизда кўришгунча соғ бўлинглар!

Шундан сўнг сўз “Вилоят маданият ва спорт ишлари бошқармаси” бошлиғи Жамшид Умарович Рашидовга берилди:  

“Ассалому алайкум ҳурматли мухлислар. Барчангизни кириб келаётган футбол мавсуми билан табриклайман. Дарҳақиқат, сўнгги йиллар давомида жамоамизнинг натижалари ҳавас қиларли даражада бўлмади. Лекин бу йилги мавсумдан ниятларимиз катта. Мухиддин Турдиевичнинг Бухоро футболини янги босқичга чиқишини кўзлаб қилаётган ишлари албатта ўз мевасини беришига ишонамиз. Бугунги кунга келиб “Бухоро” жамоасида мамлакатимизнинг энг иқтидорли, тажрибали футболчилари жамланишган. Бу футболчилар мухлисларимизни стадиондан ажойиб кайфиятда уйларига қайтишлари учун қўлларидан келганча ҳаракат қилишларига ишонамиз”-дея ўз фикрларини якунлади Жамшид Умарович.

Шундан сўнг янги футболчиларга тантанали тарзда исмлари тушурилган футболкалари топширилди.

Тақдимот маросимига оид фотосуратлар бугун этиборингизга ҳавола қилинади.