Бекзод Қодирқулов: "Хоразм"га ҳар томонлама мағлуб бўлдик"
13 сен 2021 14:20
Янгиликлар

Бекзод Қодирқулов: "Хоразм"га ҳар томонлама мағлуб бўлдик"

Про лиганинг навбатдаги туридан ўрин олган "Хоразм" - "Янгиер" (5:2) учрашувидан сўнг меҳмонлар бош мураббийи Бекзод Қодирқулов фикрлари билан ўртоқлашди.

"Ўйин ҳақида фикр билдирадиган бўлсам, барча чизиқларда рақибга мағлуб бўлдик. "Хоразм"ни ғалаба билан табриклайман. Тезкор гол ўйинимизни, режаларимизни ўзгартириб юборди. Йигитлар ўзларига келиб ҳужумлар ташкил қилишни бошлаганида иккинчи голни ўтказиб юбордик. Танаффусда керакли кўрсатмаларни бериб, ўйинчиларни алмаштирдик. Лекин бу фойда бермади. Бугун энг ёмон ўйинимизни ўтказдик. Ютқаздик, оқлаш учун ҳеч қандай баҳонамиз йўқ.

Мавсум бошида тўрт нафар легионеримиз бор эди. Уларнинг иккитасидан воз кечиб, иккитасини олиб қолгандик. Бутун жамоа ютқазди. Биринчи даврадан сўнг тажрибали футболчиларга жавоб бериб юбориб ёшларни жалб қилдик. Ёш футболчиларда барқарорсизлик кузатилади. Кейинги мавсумга жамоани шакллантириш учун ёшларни таркибга киритганмиз. Бундай мағлубиятлардан тўғри хулоса чиқариб, кейинги учрашувга тайёргарлик кўрамиз. 2022 йилдаги мақсадимиз Суперлигага чиқиш.

Муҳаммадқодир Раҳимберганов ёш ва келажаги бор футболчи. Шу боис уни жамоага жалб қилдик. Машғулотларда ишламоқда. "Хоразм" билан ўйинга яхши қўшилиб кета олмади",- дейди Бекзод Қодирқулов.

Ҳавола :

Манба : championat.asia

Янгиликларни Телеграмда ўқинг!

Рейтинг: