"Аждарлар" таркибидаги Шер ҳақида

Кечанинг асосий қаҳрамонларидан бири, шубҳасиз, учрашувда ҳисобни очган Шерзод Насруллаев бўлди. 

Маълумот учун, у 1998 йил Косонда туғилган. Мухлислар назарида футболчининг амплуаси, ўйин услуби, майдондаги ҳаракатлари-ю рақами ҳам (34) Фарруҳ Сайфиевни эслатади. 

Шерзод болалигида Фабиу Коэнтраунинг мухлиси бўлиб, португалиялик фулбэк сингари 5-рақамда майдонга тушар эди. "Аждарлар"нинг асосий жамоасига келганида Рўзиқул Бердиев уни Сайфиевга ўхшатгани учун "Пахтакор"га ўтиб кетган Фаранинг рақамида ўйнашни таклиф қилади. 

Эътиборли жиҳати, унинг Суперлигадаги дебюти айнан Сайфиевли "Пахтакор"га қарши тўғри келган. 2019 йилнинг 2-ярмидан "Насаф"нинг асосий таркибидан ўрин эгаллай бошлаган ҳимоячи ўтган мавсумга келиб, "аждарлар"нинг алмаштириб бўлмас вакилига айланди. 2021 йилда Насруллаев ўтказиб юборган 4 ўйиннинг 2 таси Қарши жамоасининг мағлубияти билан тугади. Ўша баҳслардан кейин Бердиев ҳам жамоага Шерзод етишмаётгани ҳақида гапиришга мажбур бўлганди.

Насруллаев ҳимояда тартибли ўйнашдан ташқари, доимий равишда олдинга ташланиб, рақиб мудофаачиларини ҳам саросимада ушлаб туради. Бу ҳақда статистика "гапиргани" маъқул:

1. У Суперлига-2021'нинг энг яхши плеймейкерига айланди (7 ассист).

2. ОФК кубогида ҳам Шерзоднинг олдига тушадигани бўлмади. Турнир доирасида 7 та учрашув ўтказган футболчи 1 гол, 6 та голли узатмага муаллифлик қилди.

Қадрли мухлис, сиз қандай фикрдасиз: айни пайтда Ўзбекистоннинг энг кучли чап қанот ҳимоячиси ким?