Ёш посбон, хет-трик соҳиби, легионер мураббий ва супергол муаллифи — Суперлигада 20-турнинг энг яхшилари

Championat.asia сайти талқинига кўра 20-турнинг энг яхши дарвозабони – Ҳумоюншоҳ Сайётов ("Қизилқум")

"Қизилқум" бу тур ўз майдонида (Қаршида) мусобақа жадвалида сўнгги поғонада бораётган "Металлург"ни қабул қилди ғалаба қозонди - 1:0. Учрашув бошида навоийликлар асосий посбони Роберт Озолс жароҳат олиб майдонни тарк этди ва унинг ўрнини Ҳумоюншоҳ Сайётов эгаллади. Ёш посбон шу куни ишончли ҳаракат қилди ва ўз дарвозаси даҳлсизлигини сақлаб қолди. Шу тариқа Сайётов турнинг энг яхши посбони сифатида эътироф этилди.

Championat.asia сайти талқинига кўра 20-турнинг энг яхши мураббийи – Иван Бошкович ("Сўғдиёна")

"Сўғдиёна" бу турни Наманганда "Навбаҳор"га қарши ўтказди йирик ғалабага эришди - 3:0. Ўйин давомида мезбонларга деярли имкон қолдирмаган "Сўғдиёна" сафардан 3 очко билан қайтди. Айнан Иван Бошкович турнинг энг яхши мураббийи деб топилди.  

Championat.asia сайти талқинига кўра 20-турнинг энг яхши футболчиси – Владимир Йовович ("Сўғдиёна")

Наманганда хет-трик қайд этган Владимир Йовович ортиқча гап-сўзсиз 20-турнинг энг яхши футболчиси деб топилди.  

Championat.asia сайти талқинига кўра 20-турнинг энг чиройли голи муаллифи – Хислат Ҳалилов ("Динамо")

"Динамо"нинг "Сурхон" устидан қўлга киритилган йирик ғалабасини Хислат Ҳалилов томонидан урилган гол безади. Айнан ярим ҳимоячи томонидан урилган гол championat.asia сайти талқинига кўра турнинг энг чиройли голи деб топилди.