Шомуродов гуруҳ босқичидаги барча ўйинларда гол урган ягона футболчи

Шу тариқа Ўзбекистон терма жамоаси ҳужумчиси Элдор Шомуродов гуруҳ босқичидаги барча ўйинларда ўз номини таблога ёздириб қўйган илк ва ҳозирча ягона футболчига айланди.

Эслатиб ўтамиз, Элдор Шомуродов Осиё Кубогининг биринчи турида захирадан майдонга тушиб, вакилларимизга Уммон устидан қозонилган ғалабани тақдим этувчи голга муаллифлик қилганди. Иккинчи турда эса Туркманистон билан бўлган баҳсда Шомуродов дублни расмийлаштирган. Бугун эса Япония дарвозасини ишғол этишни уддасидан чиқди.

Айни пайтда давом этаётган "F" гуруҳининг учинчи туридан ўрин олган Япония - Ўзбекистон учрашувида биринчи бўлим тугаган - 1:1.

Элдор Шомуродовнинг голига Япониядан Йошинори Муто жавоб тўпини йўллади.

"Машъал" академияси тарбияланувчиси ҳисобланган ҳужумчи айни пайтда 4 гол билан Осиё Кубоги тўпурарлар пойгасида иккинчи ўринда бормоқда. Пешқадам бўлган Қатар терма жамоаси футболчиси Алмоез Али ҳисобида 5 гол мавжуд.

ФАКТ: Элдор Шомуродов Осиё Кубогидаги дебют иштирокидаёқ Ўзбекистон терма жамоасининг қитъа чемпионатлари тарихидаги энг яхши тўпурарлари Одил Аҳмедов ва Максим Шацкихга етиб олди. Ва битта мусобақада 4та гол урган илк ўзбекистонликка футболчига айланди. Ўзбекистон терма жамоасининг Осиё кубоклари тарихидаги энг яхши тўпурари Александр Гейнрих ҳисобида 6та гол мавжуд.